Մշակույթի փոխնախարարը Կամբոջայում մասնակցում է նախարարական համաշխարհային համաժողովին

Ս. թ. փետրվարի 3-6-ը, Կամբոջայի Թագավորությունում (Սիեմ Ռիփ, Անգկոր) տեղի է ունենում տուրիզմի համաշխարհային կազմակերպության և ՅՈՒՆԵՍԿՕ-ի համատեղ' «Զբոսաշրջություն և մշակույթ. նոր համագործակցության կառուցում» խորագրով նախարարական համաշխարհային համաժողովը, որի բացմանը ներկա են գտնվել Նորին մեծություն Կամբոջայի թագավոր Նորոդոմ Սիհամոնին, Կամբոջայի վարչապետ Հուն Սենը, ինչպես նաև ՅՈՒՆԵՍԿՕ-ի գլխավոր տնօրեն Իրինա Բոկովան և նույն կառույցի համաշխարհային ժառանգության կենտրոնի տնօրեն Կիշոր Ռաոն:
Համաժողովն առաջին անգամ համախմբել է աշխարհի 37 երկրի մշակույթի և տուրիզմի նախարարների, քաղաքական գործիչների, ոլորտի լիազոր մարմինների ներկայացուցիչների և փորձագետների, ովքեր լայն ձևաչափով քննարկում են մշակույթի և զբոսաշրջության ոլորտներում առկա մարտահրավերները, դրանց համատեղման նոր մոդելների զարգացման հնարավորությունները, ինչպես նաև մշակութային արժեքների պահպանման, մշակույթի' որպես սոցիալական զարգացման տնտեսական աճի կարևոր բաղադրիչի, ստեղծագործական արդյունաբերության խնդիրները:
Համաժողովին մասնակցում է ՀՀ մշակույթի նախարարի տեղակալ Ներսես Տեր-Վարդանյանը, ով կներկայացնի 2015 թ. հուլիսին Հայաստանում կայանալիք' «Մշակութային քաղաքականություն, քաղաքականություն մշակույթի համար. Ժառանգություն+արվեստ=կայուն զարգացում» խորագրով տարածաշրջանային կոնֆերանսի ծրագիրը: