Ավստրալիան ծրագրում է 300-ով ավելացնել Իրաքում գործող զինվորական հրահանգիչների թիվը

Աշխարհ 25 Փետրվար, 2015 14:13

Ավստրալիան մտադիր է ավելացնել Իրաքում գործող իր զորակազմի թվաքանակը: Այդ մասին, ինչպես տեղեկացնում է «Արմենպրես»-ը, փետրվարի 25-ին հաղորդել է The Syndey Morning Heral թերթը:

Նրա տվյալներով՝ խոսքը վերաբերում է ընթացիկ տարվա կեսերին 200-ից մինչև 300 ավստրալացի զինվորականների փոխադրմանը՝ Իրաքի ռազմակայաններից մեկում տեղաբաշխելու համար, որոնք հանդես կգան որպես հրահանգիչներ և կուսուցանեն իրաքյան բանակի կանոնավոր զորամասերին:

Այս տարվա մայիսին Իրաք զինվորական հրահանգիչներ ուղարկելու պլանների մասին փետրվարի 24-ին հայտարարել էր Նոր Զելանդիայի վարչապետ Ջոն Կին: Ընդամենն Իրաք կուղարկվեն նորզելանդացի 143 զինծառայողներ, բայց նրանք չեն մասնակցի մարտական գործողություններին, ընդգծել է վարչապետը:

Ինչպես հայտնել է Ավստրալիայի զինված ուժերի հրամանատար Մարկ Բինսկինը, ավստրալական և նորզելանդական ռազմական գերատեսչությունները քննարկում են Իրաքում հնարավոր համատեղ գործողությունների համակարգման հարցերը, բայց առայժմ պաշտոնական որոշում չի ընդունվել: Բացառված չէ, որ այդ որոշման մասին կարող է հայտարարվել առաջիկա հանգստյան օրերին Ավստրալիայի վարչապետ Թոնի Աբոտի՝ Նոր Զելանդիա կատարելիք այցի ընթացքում:

ՏԱՍՍ-ը հիշեցնում է, որ անցյալ տարվա սեպտեմբերին Ավստրալիան Արաբական Միացյալ Էմիրությունների Մինհադ ռազմաբազա է փոխադրել ութ ինքնաթիռ, ռազմաօդային ուժերի ստորաբաժանում (շուրջ 400 մարդ) և հատուկ նշանակության ուժեր (մոտավորապես 200 մարդ): Հոկտեմբերի սկզբին ավստրալիական ինքնաթիռներն սկսել են հարվածներ հասցնել Իրաքում «Իսլամական պետություն» խմբավորման դիրքերին, իսկ նոյեմբերին հատուկ նշանակության ուժերը ԱՄԷ-ից տեղափոխվել են Բաղդադի մերձակա շրջան: Նրանք չեն մասնակցում մարտական գործողություններին, հանդես են գալիս խորհրդականների դերում և զբաղվում են իրաքյան բանակի ստորաբաժանումների ուսուցմամբ: