Յանուկովիչը կոչ է արել մեծ տերությունների ղեկավարներին՝ օգնել լուծելու ուկրաինական ճգնաժամը

Ուկրաինայի նախկին նախագահ Վիկտոր Յանուկովիչը կոչ է արել աշխարհի հզոր երկրների ղեկավարներին՝ հետևողական լինել ուկրաինական ճգնաժամի լուծման հարցում, տեղեկացնում է «Արմենպրես»-ը:

«Իշխանությունն իր բոլոր վրիպումները բացատրում է պատերազմով: Հակամարտությունը կանգնեցնելու համար անհրաժեշտ է, որ միջազգային հանրակցությունը ճնշում գործադրի Ուկրաինայի ղեկավարության վրա՝ պատերազմին վերջ դնելու նպատակով: Ուստի ես խնդրում եմ աշխարհի ղեկավարներին՝ հետևողական լինել պատերազմի դադարեցմանն ուղղված իրենց գործողություններում: Չէ՞ որ շատ մեծ թով խաղաղ մարդիկ են զոհվում»,- Յանուկովիչի խոսքը մեջբերել է «Արգումենտի և ֆակտի» թերթը:

Յանուկովիչը հավելել է, որ միայն բանակցային գործընթացի միջոցով կարելի է դուրս գալ երկրում ստեղծված փակուղուց: «Խաղաղ պայմանավորվածությունների հասնելու դեպքում մեծ տերությունները պետք է դառնան դրանց կատարման երաշխավորը»,- ասել է նա:

«Ուկրաինան հայտնվել է արտաքին կառավարման ներքո, երբ ներկայիս ղեկավարներին դրսից են թելադրում՝ ինչ որոշումներ ընդունել: Կարծում եմ, որ իշխանության գալու տարեդարձին այդ ստախոսները պետք է դուրս գան մայդան և մարդկանց առջև հաշիվ տան իրենց խոստումների կատարման մասին: Մարդիկ, որոնց նրանք խաբել են, իրենք գնահատական կտան»,- ասված է Յանուկովիչի հոդվածում, հաղորդել է ՌԻԱ Նովոստին: