Իրանցի այլախոհները պնդում են, որ Թեհրանը միջուկային զենքը մշակում է գետնի տակ

Իրանցի այլախոհները հայտարարել են, որ Թեհրանը միջուկային զենքի մշակում է կատարում գետնի տակ գտնվող գաղտնի օբյեկտում՝ չնայած միջուկային ծրագրի շուրջը միջազգային միջնորդների «վեցյակի» հետ բանակցություններին: Այդ մասին, ինչպես տեղեկացնում է «Արմենպրես»-ը, փետրվարի 25-ին հաղորդել է Fox News հեռուստաալիքը :

Ինչպես Վաշինգտոնում հայտնել է Իրանական դիմադրության ազգային կենտրոնի (NCRI) ներկայացուցիչ Ալիռըզա Ջաֆարզադեն, NCRI-ի տվյալներով, «Լավիզան-3» անվանմամբ համալիրը գտնվում է Թեհրանի մոտ: Ջաֆարզադեի խոսքով՝ այդ օբյեկտը «գտնվում է խորը գետնի տակ՝ թունելների և ստորգետնյա կառույցների ցանցում», այն ունի ռադիացիոն ճառագայթման նկատմամբ կայուն հատուկ դռներ, որպեսզի «ճառագայթման արտահոսքերը չգրանցեն ՄԱԳԱՏԷ-ի տեսուչները»:

NCRI-ի տվյալներով՝ համալիրը բաղկացած է մի քանի յարուսներից, դրանք միացնում է թունելը, որից այն կողմ գտնվում են չորս զուգահեռ սրահներ ավելի քան 40 մետր խորության վրա: Ի հաստատումն համալիրի գոյության, որտեղ իբր ուրանի հարստացում է կատարվում միջուկային զենք ստեղծելու համար, իրանցի այլախոհները ներկայացրել են երկու լուսանկար: Ինչպես նշում է ՌԻԱ Նովոստին, դրանցից մեկի վրա երևում է 40 սանտիմետր հաստությամբ կապարե դուռ, որը, նրանց խսքով, համալիրը պաշտպանում է ճառագայթման ներգործությունից, ինչպես նաև «Լավիզան-3»-ի ենթադրյալ սխեման:

Այլախոհների կարծիքով՝ այդ համալիրում 2008 թվականից ուրանի հարստացում է կատարվում: NCRI-ում կարծում են, որ ՄԱԳԱՏԷ-ն պետք է կատարի օբյեկտի «անհապաղ տեսչական ստուգում»:

«Լավիզան-3» համալիրի և Թեհրանի կողմից միջուկային զենքի մշակման պաշտոնական հավաստում չկա: Իրանի իշխանությունները բազմիցս հայտարարել են իրենց միջուկային ծրագրի խաղաղ բնույթի մասին: