ՄԱԿ-ի Անվտանգության խորհուրդը հանդիպում է անցկացնելու Ուկրաինայի իրադրության շուրջ

ՄԱԿ-ի Անվտանգության խորհուրդը պլանավորում է փետրվարի 27-ին հանդիպում անցկացնել Ուկրաինայի արևելքի իրադրությունը քննարկելու և հակամարտության կարգավորման շուրջ փետրվարի 12-ին նիստում ձեռք բերված համաձայնությունների կատարումը գնահատելու համար: Ինպես ՏԱՍՍ-ին հայտնել է ԱԽ-ի արևմտյան անդամ երկրներից մեկի դիվանագետը, սպասվում է, որ հանդիպմանը կմասնակցի շփման խմբում ԵԱՀԿ-ի հատուկ ներկայացուցիչ Հայդի Տալյավինին, տեղեկացնում է «Արմենպրես»-ը:

«Ամենայն հավանականությամբ, ուրբաթ առավոտյան (Երևանի ժամանակով երեկոյան) Ուկրաինայի շուրջ հանդիպում կկայանա ԵԱՀԿ-ի ներկայացուցիչ Տալյավինիի մասնակցությամբ»,-ասել է գործակալության զրուցակիցը:

Նրա խոսքով՝ առայժմ որոշում չի ընդունվել՝ բաց է լինելու հանդիպումը, թե՝ փակ: «Ձևաչափը դեռ պետք է համաձայնեցվի»,-նշել է դիվանագետը:

Նա նաև հայտնել է, որ հանդիպմանը հազիվ թե արծարծվի Ուկրաինաում ՄԱԿ-ի խաղաղապահների տեղաբաշխման հարցը, ինչը հնարավոր է միայն Անվտանգության խորհրդի թույլտվությամբ: «Ոչ մի բան չի խոսում այն մասին, որ կքննարկվի ՄԱԿ-ի խաղաղապահների վերաբերյալ առաջարկությունը»,-հայտարարել է զրուցակիցը:

Փետրվարի 25-ին ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը նախազգուշացրել է Ուկրաինայի արևելքում ստեղծված կրիտիկական իրադրության մասին և կոչ է արել կողմերին՝ կատարել Մինսկի պայմանավորվածությունները: «Ուկրաինայի իրադրությունը, իրոք, կրիտիկական է: Այժմ հարկավոր է, որ բոլոր կողմերը, որոնք Մինսկում պայմանավորվել են համալիր միջոցառումների շուրջ, կատարեն իրենց ստանձնած պարտավորությունները և դադարեցնեն մարտական գործողությունները, որպեսզի հնարավորություն տան խաղաղ բնակիչներին՝ վերադառնալու բնականոն կյա նքին, և իսկական քաղաքական երկխոսություն սկսեն: Ստորագրվել են համաձայնագրեր, և դրանք պետք է կատարել»,- նշել է դիվանագետը:

Դյուժարիկը հայտնել է, որ մարտի 2-ին ներկայացվելու է Ուկրաինայում մարդու իրավունքների հետ կապված իրադրության դիտարկման գծով ՄԱԿ-ի առաքելության հերթական՝ թվով իններորդ հաշվետվությունը: Սկսած ընթացիկ տարվանից՝ այդ հաշվետվությունները հրապարակվելու են եռամսյակը մեկ, այլ ոչ թե ամեն ամիս, ինչպես առաջ էր: Վերջին զեկույցը դեկտեմբերի 15-ին ներկայացվել էր Ժնևում:

ՄԱԿ-ի հումանիտար հարցերի համակարգման վարչության վերջին տվյալների համաձայն՝ Դոնբասում հակամարտության ընթացքում զոհվել է գրեթե 5,7 հազար մարդ, վիրավորների թիվը հասնում է մոտավորապես 14,6 հազարի: