Չինաստանի բնակչությունը հասել է 1,367 միլիարդի՝ մեկ տարում ավելանալով 7 միլիոնով

Աշխարհ 26 Փետրվար, 2015 20:25

Աշխարհի առավել բնակեցված երկրի՝ Չինաստանի բնակչությունը 2014 թվականին ավելացել է 7 միլիոնով և կազմել 1 միլիարդ 367 մլն 820 հազար մարդ: Այդ մասին, ինչպես տեղեկացնում է «Արմենպրես»-ը, ասված է Չինաստանի՝ 2014 թվականի սոցիալ-տնտեսական զարգացման վերաբերյալ վիճակագրական կոմյունիկեում, որը հրապարակվել է փետրվարի 26-ին:

Վիճակագրության տվյալների համաձայն՝ Չինաստանի բնակչության բնական աճը հազար մարդու հաշվով կազմել է 5,21: Անցյալ տարի նորածինների թվաքանակը կազմել է 16,87 միլիոն, իսկ մահացածների թվաքանակը՝ 9,77 միլիոն: Բնակչության ընդհանուր թվի 51,2 տոկոսը տղամարդիկ են, 48,8 տոկոսը՝ կանայք: Չինաստանի բնակչության շուրջ 15,5 տոկոսը 60-ից բարձր տարիքի մարդիկ են:

Բնակչության կեսից ավելին՝ 54,77 տոկոսը, ապրում են քաղաքներում, 45,23 տոկոսը՝ գյուղական վայրերում:

1970-ական թվականների վերջին Չինաստանն սկսել է կիրառել «մեկ ընտանիք՝ մեկ երեխա» քաղաքականությունը, որպեսզի վերահսկի բնակչության աճը՝ քաղաքներում բնակվող ընտանիքներին թույլ տալով ունենալ մեկ երեխա, իսկ գյուղերում՝ երկու, եթե առաջին երեխան աղջիկ է: Սակայն ժամանակի հետ այդ քաղաքականությունը հանգեցրեց ժողովրդագրական այնպիսի խնդիրների, ինչպիսիք են՝ գենդերային դիսբալանսը և բնակչության ծերացումը:

2012 թվականին Չինաստանի 15-59 տարեկան աշխատունակ բնակչությունը կրճատվել է 3,45 միլիոնով, ինչը «բացարձակ կրճատում» դարձավ 1979 թվականին բարեփոխումների քաղաքականության սկսվելու ժամանակներից ի վեր, գրում է China Daily թերթը:

Գենդերային դիսբալանսը ծնելիության սահմանափակման քաղաքականության ևս մի կողմն է: Չինացի կանայք նախընտրում են ընդհատել հղիությունը, եթե իմանում են, որ ապագա երեխան աղջիկ է: Անցյալ տարի նորածին տղաների ու աղջիկների հարաբերակցությունը կազմել է 115,88 առ 100: 2013 թվականին այդ ցուցանիշը կազմում էր համապատասխանաբար 117,6 առ 100, նշում է հրատարակությունը:

Անցյալ տարի իշխանությունները մեղմացրեցին քաղաքականությունը՝ ծագած խնդիրները լուծելու նպատակով: Այժմ այն ընտանիքներին, որտեղ ամուսիններից թեկուզ մեկն իր ընտանիքի միակ երեխան է, թույլատրվում է երկրորդ երեխան ունենալ:

2014 թվականի վերջի դրությամբ՝ շուրջ 1 մլն ընտանիքներ են երկրորդ երեխան ունենալու դիմում ներկայացրել, գրում է China Daily թերթը: Չինաստանի բնակչության ասոցիացիայի ղեկավար Չժայ Չժենվուն նշում է, որ 2015 թվականին նորածինների թվաքանակը կավելանա: Փորձագետի կարծիքով, որը մեջբերում է թերթը, իշխանությունները կշարունակեն պլանային մանկածնության քաղաքականության մեղմացումը, իսկ բեբի-բումը Չինաստանում կարող է տևել 5-ից մինչև 8 տարի, հաղորդել է ՌԻԱ Նովոստի գործակալությունը: