«Իրանը ցանկացած պահի կկարողանա վերսկսել ուրանի հարստացումը մինչև 20 տոկոսի մակարդակ». Սալեհի

Թեհրանը կկարողանա վերսկսել ուրանի հարստացումը մինչև 20 տոկոսի մակարդակ այն դեպքում, եթե «վեցյակը» (ՄԱԿ-ի Անվտանգության խորհրդի հինգ մշտական անդամները և Գերմանիան) հրաժարվի Իսլամական Հանրապետության միջուկային ծրագրի վերաբերյալ ապագա վերջնական համաձայնագրի շուրջ իր պարտավորություններից: Այդ մասին, ինչպես տեղեկացնում է «Արմենպրես»-ը, Իրանի ատոմային էներգիայի կազմակերպության ղեկավար Ալի Աքբար Սալեհին հայտարարել է ազգային հեռուստատեսության եթերում:

«Ինչ վերաբերում է մինչև 20 տոկոս հարստացված ուրանին, ապա մենք ցանկացած ժամանակ կկարողանանք միավորել ցենտրիֆուգների երկու կասկադ ավելի քան 5 կիլոգրամ նման վառելիք արտադրելու համար այն դեպքում, եթե հակառակ կողմը չկատարի իր ստանձնած պարտավորությունները»,-ընդգծել է Սալեհին:

Ինչպես նշում է ՏԱՍՍ-ը, «վեցյակի» հետ 2013 թվականի նոյեմբերի 24-ի ժամանակավոր համաձայնագրով ստանձնած պարտավորություններին համապատասխան, Իրանը իր միջուկային օբյեկտներում ուրանի հարստացման մակարդակը նվազեցրել է մինչև 5 տոկոս: Ժամանակավոր համաձայնագիրը գործում է մինչև 2015 թվականի հունիսի 30-ը: Մինչ այդ Իրանը և «վեցյակը» ձգտում են վերջնական համապարփակ համաձայնության հասնել Թեհրանի միջուկային ծրագրի շուրջ:

Ավելի վաղ Իրանի գերագույն առաջնորդ այաթոլլա Ալի Խամենեին հայտարարել է, որ Իրանի և միջազգային միջնորդների «վեցյակի» միջև Թեհրանի միջուկային ծրագրի շուրջ շրջանակային համաձայնագիրը չի երաշխավորում, որ վերջնական պայմանագիր կստորագրվի: Խամենեին նաև ասել է, որ «իրանական միջուկային ծրագրի վերաբերյալ նախնական համաձայնագիրը իրավաբանական պարտավորություններ չի առաջացնի»: Բացի այդ, Իրանի գերագույն ղեկավարը նշել է, որ «հիմնվելով նախորդ փորձի վրա՝ երբեք լավատեսորեն տրամադրված չի եղել ԱՄՆ-ի հետ բանակցությունների հարցում»:

Իր հերթին, Իրանի նախագահ Հասան Ռոուհանին հայտարարել է, որ Իրանը միջուկային ծրագրի վերաբերյալ վերջնական համաձայնագիրը չի ստորագրի այնքան ժամանակ, քանի դեռ չեն չեղարկվել նրա դեմ սահմանված բոլոր պատժամիջոցները:

«Մենք ոչ մի համաձայնագիր չենք ստորագրի, եթե նույն օրը չհանվեն բոլոր պատժամիջոցները,- ընդգծել է Ռոուհանին:- Մենք փոխշահավետ գործարք են ցանկանում միջուկային դոսյեի շուրջ բանակցությունների գործընթացում ներգրավված բոլոր կողմերի համար»: