Բաղրամյան պողոտայում նստացույցը շարունակվում է. «Մնացե´ք, մնացե´ք, մնացե´ք» (ուղիղ միացում)

Բաղրամյան պողոտայում նստացույցը շարունակվում է:

02.00

Այս ժամի դրությամբ դեռևս Բաղրամյան պողոտան մարդաշատ է: Հավաքված քաղաքացիները երգում են, պարում և պահանջում: Մասնակցիներից շատերն անգամ պատրաստված են եկել՝ իրենց հետ բերելով սնունդ, ջուր, սուրճ և հագուստ:

00.30

«Ոչ մի խոչընդոտ մեզ չի կարող խանգարել: Մենք այստեղ կմնանք այնքան ժամանակ մինչև մեր պահանջը կկատարեն»,- ասում են ակտիվիստները և կոչ անում հավաքվածներին գիշերը մնալ Բաղրամյան պողոտայում: «Մնացե´ք, մնացե´ք, մնացե´ք»,- սկսեցին բացականչել քաղաքացիները:

23:20

Ցուցարարներին են միացել նաև Արցախից: Արցախից եկածները իրենց հետ բերել են Արցախի Հանրապետության դրոշ, որն էլ ծածանում են:

22:47

Գործողություններ ցանկացած պահի կարող ենք կատարել: Բավականին ուժ և միջոցներ ունենք. Հունան Պողոսյանը խոսել է լրագրողների հետ:

22:31

Մենք երեք տարի անընդմեջ էլեկտրաէներգիայի գին ենք թանկացնում: Անկանխատեսելի դաշտում ենք գտնվում, մենք պետք է երաշխիքներ ունենանք, որ օրինակ մյուս տարի թանկացում չի լինի. Նիկոլ Փաշինյան:

22.00

Բաղրամյան պողոտայում են Ազգային ժողովի պատգամավորներ, մտավորականներ, հասարակական-քաղաքական գործիչներ: Նրանք եկել են` կանխելու հնարավոր սադրանքները:

21.20

Քաղաքացիներից մեկի ինքնազգացողությունը վատացել է: Նրան օգնելու համար բողոքի ակցիայի մասնակիցները կազմակերպված կերպով ճանապարհ բացեցին շտապ օգնության մեքենայի համար: Քաղաքացին տեղափոխվեց հիվանդանոց:

20.50

Ակտիվիստ Վաղինակ Շուշանյանը հայտարարեց, որ իրենց բողոքի ակցիան խաղաղ է և դիմեց հավաքվածներին. «քարեր, շշեր, փայտեր ունեցողները սադրիչներ են և պետք է դուրս հանենք մեր շարքերից»: Ակտիվիստներից մեկն էլ հայտնեց, որ կա ինֆորմացիա սադրանք նախատեսելու վերաբերյալ: Ոմանց մոտ քաղաքացիները քարեր, շշեր և փայտեր են ֆիքսել:

20.30

Երեւանի ոստիկանապետ Աշոտ Կարապետյանը քիչ առաջ լրագրողներին տեղեկացրեց, որ ցուցարար Տիգրան Մադոյանին ոչ թե բերման են ենթարկել , այլ Մադոյանի մայրը հաղորդում է տվել իր որդու անհետ կորելու մասին: Մայրը տեղյակ չէր, որ որդին Բաղրամյան պողոտայում է եղել:

20.25

Բաղրամյան պողոտայում երիտասարդ աղջկա ինքնազգացողությունը վատացավ: Տեղում ցուցաբերվեց բուժօգնություն և տեղափոխվեց հիվանդանոց:

20.20

Քաղաքացիներին բաժանվեց նախորդ օրը քաղաքացիական հագուստով բողոքի ակցիայի ընթացքում ուժ կիրառած ոստիկանների լուսանկարները: Ցուցարարներից շատերը վառեցին բաժանված լուսանկարները:

20.00

Ոստիկանության աշխատակիցների աշխատանքը կանոնավորելու նպատակով Բաղրամյան պողոտա էր եկել նաև Հայաստանի ոստիկանապետ Վլադիմիր Գասպարյանը:

19.53

Վալերի Օսիպյանն ասաց, որ դեռևս ոչ մի գործողության չեն գնա և չի նախատեսվում ուժ կիրառել: «Թող ոչ մեկ չկասկածի ոստիկանության պրոֆեսիոնալիզմի վրա, թեկուզ այս բազմահազարանոց ցույցի ընթացքում ոստիկանությունը կարող է հասարակական կարգը պահպանել»,- ասաց Օսիպյանը:

19.30

Քաղաքացիներից մեկը բերման է ենթարկվել: Դեռևս ճշտվում է ոստիկանության բաժին բերման ենթարկելու պատճառը: «Ազատում, ազատում»,- վանկարկում են քաղաքացիները:

19.00

Բաղրամյան պողոտայում արդեն իսկ հավաքվել են մի քանի հազար քաղաքացիներ` «Ոչ հոսանքի թանկացմանը» պահանջով:

18.05

«Ոչ թալանին» նախաձեռնության անդամ Վաղինակ Շուշանյանը դիմեց ցուցարարներին, որպեսզի նրանք այլևս աղբի արկղեր չտեղափոխեն Բաղրամյան պողոտա, քանի որ դրանք արդեն բավարար են: «Իսահակյան փողոցում կան արկղեր, դրանք հանձնում ենք ընկերությանը, ու խնդրում եմ այլ արկղեր չտեղափոխել»,- ասաց Վաղինակ Շուշանյանը:

17.10

Երևանում աղբահանություն իրականացնող «Սանիթեք» ընկերությունը պահանջում է վերադարձնել աղբամանները, որոնք սեփականության իրավունքով պատկանում են այս ընկերությանը: Նշենք, որ երեկ գիշերվանից աղբարկղերով Բաղրամյան պողոտայում որպես բարիկադներ են կառուցել ակտիվիստները:

16.20

Վաղինակ Շուշանյանը քիչ առաջ ակտիվիստներին հայտնեց, որ երեկոյան իրենց կմիանան Չարենցավանի բնակիչները, ովքեր ավտոերթ կկազմակերպեն։

14.33

Բաղրամյան պողոտայում ցուցարարները հովանոցներ են տեղադրել: Ոստիկանությունը չի առարկել 5-6 հովանոցի տեղադրման փաստին: Իրավիճակը հանգիստ է, հավաքվածներին սնունդ ու ջուր բերեցին:

13.31

Ոստիկանությունը քիչ առաջ Բաղրամյան պողոտայում վանդակաճաղեր տեղադրեց, որից հետո նոսրացրեց շղթա կազմած ոստիկանների թիվը:

12.17

Ոստիկանությունը տեղեկություն էր ստացել, որ աղբամաններում, որոնցով ցուցարարները բարիկադներ են կազմել, զենք ու քարեր կան: Խուզարկության ժամանակ պարզվեց՝ միայն շինարարական աղբ է:

11.54

Քիչ առաջ ցուցարարները բոլոր ոստիկաններին ջուր և խնձոր էին հյուրասիրում: Ոստիկանները հրաժարվում էին:

11.24

Երեկ քաղաքացիների մոտ տարբեր տեսակի սառը զենքեր են հայտնաբերվել: Այս մասին լրագրողների հետ զրույցում ասաց ՀՀ փոխոստիկանապետ Հունան Պողոսյանը:

«Ոստիկանությունը նաև անտեսանելի աշխատանք է կատարում: Երեկվա անտեսանելի աշխատանքի արդյունքում բիզեր, դանակներ են հայտնաբերվել քաղաքացիների մոտ»,- ասաց նա:

11.06

«Այս ապօրինի որոշումը պետք է կասեցվի: Բոլորին կոչ ենք անում գալ Բաղրամյան պողոտա»,- հայտարարեց «Ոչ թալանին» նախաձեռնության անդամ Արամ Մանուկյանը՝ նշելով, որ շուտով պայքարի մասնակիցներով հստակ կասեն, թե որոնք են իրենց հետագա քայլերը:

10:44

Բաղրամյան պողոտայում ոստիկանների շարքերը նոսրացել են:

10.29

Ցուցարարների և կենդանի պատ կազմած անձանց միջև ընդհարում տեղի ունեցավ: Վերջիններիս փորձում էին ցուցարարներին համոզել հեռանալ Ազատության հրապարակ, ինչը բարկացրեց նրանց:

Ցուցարարներից մեկը վիրավորեց դերասան Հովհաննես Ազոյանին, վերջինս բորբոքվեց, բայց նրան հորդորեցին սադրանքի չտրվել:

10.03

ՀՀ փոխոստիկանապետ Հունան Պողոսյանը հայտարարեց, որ դեռևս հատուկ գործողությունների չեն դիմի, քանի որ այս պահի դրությամբ սադրանքներ չկան և հավաքը խաղաղ բնույթ է կրում: Ցուցարարները ճիշտ ճանապարհ չեն ընտրել, քանի որ հավաքի պատճառով կաթվածահար է լինում տվյալ հատվածի երթևեկությունը: