Մալևիչի կտավը Sotheby's-ի աճուրդում վաճառվել է 21,4 միլիոն ֆունտով

Մեծ Բրիտանիայի մայրաքաղաքում Sotheby's աճուրդային տունը 178,6 միլիոն ֆունտ (273,6 միլիոն դոլար) է վաստակել իմպրեսիոնիստների և արդի արվեստի ստեղծագործությունների վաճառքից: Ինչպես տեղեկացնում է «Արմենպրես»-ը, ընդհանուր առմամբ հավաքորդներին առաջարկվել էր 51 լոտ, որոնցից շատերի համար պայքարն սկսվել է 10 միլիոն ֆունտ (15 միլիոն դոլար) նշագծից բարձր գումարով:

Երեկոյի հիմնական լոտերից մեկը դարձել է ռուս ավանգարդիստ-նկարիչ Կազիմիր Մալևիչի (1879 – 1935 թթ,) նկարը: 100 տարի առաջ ստեղծված «Սուպերմատիզմ: 18-րդ կառուցվածք» կտավն աճուրդով վաճառվել է 21,4 միլիոն ֆունտով (32,8 միլիոն դոլարով), ինչը փոքր-ինչ բարձր է եղել դրա նախնական գնահատման արժեքի ստորին սահմանից:

53 x 53 սմ չափով կտավի վրա պատկերված են միմյանց սերտորեն կպած հինգ քառանկյուններ՝ գույնով, ձևով և չափով տարբեր, բայց միացված ներքին շարժման միասնական ուժով: Այս նկարն աճուրդի էին հանել Մալևիչի ժառանգները, հաղորդել է ՏԱՍՍ-ը: