ՀՀ-ում ԱՄՆ դեսպանությունն առաջիկայում կվերականգնի վիզաների ծառայությունները

Հյուպատոսական համակարգերի հետ կապված խնդիրները կարգավորելու ուղղությամբ ԱՄՆ պետքարտուղարության հյուպատոսական վարչության գործուն ջանքերի շնորհիվ ՀՀ-ում ԱՄՆ դեսպանությունն ակնկալում է եկող շաբաթվանից ամբողջությամբ վերականգնել վիզաների ծառայությունները: Ինչպես տեղեկացրել են ԱՄՆ դեսպանատնից, տեխնիկակական խափանման հետևանքով առաջացած կուտակումների պատճառով դեսպանությունը դեռևս չի կարողանա անձնագրերը վերադարձնել դիմումը բավարարելուց հետո 2-3 աշխատանքային օրվա ընթացքում, ինչպես սովորաբար արվում էր:

Դեսպանատնից ոչ ներգաղթային վիզայի դիմումատուներին (տուրիստական, բիզնես, ուսանողական և այլ վիզաներ) կոչ է արվել զանգահարել նոր պայմանավորվածություն ձեռք բերելու համար: Միաժամանակ, դեսպանությունը հորդորել է հարցազրույցն անցած և վիզայի տրամադրման դիմումը բավարարված անձանց սահմանված օրերին և ժամերին գնալ և վիզայով ստանալ ԱՄՆ դեսպանատնից:

«Եթե դուք հարցազրույցն անցել եք, ու վիզայի տրամադրման ձեր դիմումը բավարարվել է, և ձեր անձնագիրը ձեզ մոտ է, ապա սկսած հունիսի 29-ից դուք կարող եք ձեր անձնագիրը բերել և թողնել դեսպանատանը: Մենք վիզայով անձնագիրը ձեզ կվերադարձնենք մեկ օրացուցային շաբաթից, իսկ այդ ժամկետը շաբաթ-կիրակի կամ ոչ աշխատանքային օրերին լրանալու դեպքում՝ հաջորդ աշխատանքային օրը: Եթե դուք հարցազրույցն անցել եք, ու վիզայի տրամադրման ձեր դիմումի հետ կապված լրացուցիչ վարչական վարույթ է պահանջվել ու ձեր գործի համարն արդեն տեղակայված է կայքում, ապա հունիսի 29-ից սկսած կարող եք ձեր անձնագիրը բերել և թողնել դեսպանատանը: Մենք վիզայով անձնագիրը ձեզ կվերադարձնենք մեկ օրացուցային շաբաթից, իսկ այդ ժամկետը շաբաթ-կիրակի կամ ոչ աշխատանքային օրերին լրանալու դեպում՝ հաջորդ աշխատանքային օրը»,- նշվում է ԱՄՆ դեսպանատան հաղորդագրության մեջ: