«Երբ քաղաքացին օրենք է խախտում, դառնում է չքաղաքացի». Վլադիմիր Գասպարյան (տեսանյութ)

Երբ քաղաքացին օրենք է խախտում, դառնում է չքաղաքացի: Ոստիկանությունը չի հանդուրժի էլեկտրաէներգիայի դեմ բողոքողների շարքում ագրեսիայի որևէ դրսևորում և կպատժի ցանկացած հարբածի: Այս մասին Բաղրամյան պոտողայում լրագրողների հետ զրույցում ասաց ՀՀ ոստիկանապետ Վլադիմիր Գասպարյանը:

«Ուշադիր եղեք ձեր շուրջը և հարբած մարդկանց թույլ մի տվեք մտնել նստացույցի տարածք: Եթե մարդիկ իրենց սոցիալական պահանջն են ներկայացմում, մենք խնդիր չունենք, բայց երբ դրա տակ խաժամուժ է մտնում, զինված մարդ է մտնում, նման դեպքերը չեն հանդուրժվում, կանխվում են անմիջապես: Մի պահ պատկերացրեք' ինչ կնշանակի, երբ մի արկածախնդիր մի քար նետի»,- ասաց Գասպարյանը:

Վլադիմիր Գասպարյանը նշեց, որ Սերժ Սարգսյանի հետ քննարկում է իրավիճակը: «Երբ կա օրինախախտում, ես դա պետք է կասեցնեմ, չկա օրինախախտում, ոստիկանությունն ապահովում է խաղաղ հավաքի անվտանգությունը: Ոստիկանների մեջ սադրիչներ չկան: Ես դա ամենայն պատասխանատվությամբ հայտարարում եմ, նման հասկացություն չի կարող լինել՝ սադրիչ ոստիկան»,- ասաց ՀՀ ոստիկանապետը՝ պատասխանելով նաև քաղաքացիական համազգեստով ոստիկանների՝ հունիսի 23-ի պահվածքի մասին հարցին. «Եթե քաղաքացիական համազգեստով ոստիկանը խախտումներ է արել, այդքան տեսագրություն կա, ես կգտնեմ նրանց»:

Ինչ վերաբերում է հունիսի 26-ի երեկոյան և 27-ի գիշերը Մաշտոցի պողոտան փակելու ցուցարարների վարքագծին, Վլադիմիր Գասպարյանը հայտարարեց, որ չի հանդուրժի, որ Բաղրամյան փողոցի փակ լինելու հետ, փակվի նաև Մաշտոցի պողոտան:

Իսկ ոստիկանների և ցուցարարների միջև կենդանի պատ կազմած պատգամավորներին' սթափության կոչի մասին հարցին ի պատասխան ՀՀ ոստիկանապետն ասաց. «Կարծում եմ, որ եթե որպես դեկորացիա է, ֆիքսվելու համար, պիտանի չէ, իսկ եթե եկել են սրտացավությամբ և ուզում են որևէ խնդիր լուծեն, թող իրենց փորձը տան երիտասարդներին, որ սադրիչներ չմտնեն նրանց մեջ: Տեղ-տեղ կենդանի պատը դեկորացիա է»:

Լրագրողներին էլ նա կոչ արեց խաղաղվել, հանգիստ աշխատել, քանի որ շաբաթ է, հանգստյան օր է: «Ոչ մեկ ոչ մեկին չի պատրաստվում վախեցնել, եթե օրինախախտումներ չլինեն, ոստիկանությունը որևէ քայլի չի դիմի»,- հայտարարեց ոստիկանապետը:

Տեսանյութը՝ 1in.am-ի