«Մեր պայքարը չի ավարտվել». Մանվել Գրիգորյան

ԵԿՄ վարչության նախագահ, Արցախի հերոս, գեներալ-լեյտենանտ Մանվել Գրիգորյանը շնորահավորել է Մարտակերտի ազատագրման 22-րդ տարեդարձի կապակցությամբ:

Սիրելի մարտակերտցիներ.

Երկրապահ-ազատամարտիկներ.

Սիրելի մայրեր, քույրեր

Շնորահավորում եմ բոլորիս, Մարտակերտի ազատագրման 22-րդ տարեդարձի կապակցությամբ:

Մեր ժողովրդին պարտադրված պատերազմում ամենադառը բաժինը հասավ Մարտակերտին: Բայց Մարտակերտը, ողջ հայ ժողվորդի հետ միասին իր խիզախ որդիների կյանքի, առողջության ու հերոսականության շնորհիվ հաղթահարեց պատերազմի ողջ դժվարությունները եւ տեր կանգնեց իր հայրենիքին:

Հայաստանի Հանրապետության եռասերունդ երկրապահների'5-րդբրիգադի մարտիկների, երիտասարդ և պատանի երկրապահների, ազատամարտիկների անունից ողջունում եմ ձեզ սիրելի մարտակերտցիներ:

Փառք ձեզ, որ ապրում եք ձեր պապենական օջախներում, շենացնում այն ու տարածաշրջանը լցնում ձեր երեխաների ուրախությամբ:

Հարգելի ժողովուրդ.

Մեր պայքարը չի ավարտվել: Մարտակերտում կառուցվող ամեն մի տուն, մշակույթի ամեն մի օջախ, տեղադրվող ամեն մի խաչքար, ծնվող ամեն մի երեխա' մեր պայքարի շարունակությունն են:

Մենք, 94-ի գարնանը պարտադրեցինք թշնամուն զինադադարի գալ: Հիմա նա նորից է փորձում խանգարել մեր անդորրը:

Նրանց քայլերի դեմ, մեր պատասխանը միասնությունն է:

Մենք չենք կարող միասին չլինել:

Մենք, ինչպես մեր պայքարի առաջին փուլում, այնպես էլ հիմա ձեր կողքին ենք:

Ես միշտ ասել եմ, Երեւանի պաշտպանությունը սկսվում է այստեղից, Մարտակերտի, Հադրութի, մեր սահմանամերձ շրջաններից: Այս սահմանամերձ գյուղերն էլ հզոր են Երեւանով, այսինքն հայ ժողովրդի միասնությամբ:

Մենք' միշտ ձեր կողքին ենք:

Ձեր կողքին են երկրապահները, 5-րդ բրիգադի մարտիկներն ու նրանց գործը շարունակելու պատրաստ մեր հրաշալի երիտասարդ ու պատանի երկրապահները: Վստահեցնում եմ ձեզ, որ հիմա նոր սերունդ է աճում, մեզանից ավելի հայրենասեր, ավելի պատրաստակամ պաշտպանելու իր սրբությունները' իր մորը, իր հայրենիքը, իր հավատքը: Մենք ամեն օր դրանում համոզվում ենք, զբաղվելով նրանց ռազմահայրենասիրական դաստիարակությամբ:

Զինադադարից հետո մեր ուխտագնացությունը ՀՀ մարզեր, սահմանամերձ շրջաններ եւ Արցախ դրա վառ ապացույցն են:

Ես հպարտ եմ, որ այսօր Մարտակերտի ժողովուրդը, ողջ Արցախի բնակչությունը, ապրելով այստեղ երեխա են ծնում ու սնում, կրթում ու դաստիարակում, ցորեն են ցանում, շենացնում իրենց օջախները, սահման պահում ու պաշտպանում և հավերժացնում են մեր սուրբ նահատակների հիշատակը:

Փառք մեր ժողովրդին։

Փառք Մարտակերտի համար նահատակված Մեր քաջորդիներին։

Աստված բոլորիս պահապան սիրելի ժողովուրդ: Մեզ կամք և միասնություն:

Սիրով և խորին հարգանքներով՝