ՊՆ-ում մեկնարկել են ամենամյա հավաք-պարապմունքները

ՀՀ ՊՆ վարչական համալիրում հոկտեմբերի 12-ին մեկնարկել են պաշտպանական հարցերի վերաբերյալ մեկշաբաթյա հավաք-պարապմունքներ ՀՀ գործադիր իշխանության, պետական և տարածքային կառավարման մարմինների պաշտոնատար անձանց մասնակցությամբ: Ինչպես տեղեկացնում են ՀՀ պաշտպանության նախ արարության տեղեկատվության եւ հասարակայնության հետ կապերի վարչությունից, հավաք-պարապմունքների շրջանակներում դասախոսություններով հանդես են գալու պաշտպանական գերատեսչության, ինչպես նաև պետական կառավարման այլ մարմիների ներկայացուցիչներ: Կներկայացվեն պետությունը և պետության միասնական կառավարման համակարգը ռազմական դրության փոխադրելու հիմնադրույթներին, ժամանակակից պատերազմների բնույթին ու զորահավաքային խնդիրներին առնչվող դասախոսություներ:

Ողջունելով հավաք-պարապմունքների մասնակիցներին՝ ՀՀ ԶՈւ գլխավոր շտաբի պետ, գեներալ-գնդապետ Յուրի Խաչատուրովն ընդգծել է, որ նմանաբնույթ հավաքներն ամրապնդում են պետության պաշտպանունակությունը, նպաստում հնարավոր թերացումների բացառմանը: Անդրադառնալով սեպտեմբերին ՀՀ տարածքում անցկացված «Շանթ 2015» զորավարժությանը՝ Յուրի Խաչատուրովը բարձր է գնահատել ներգրավված կառույցների գործողություններն ու զորավարժության արդյունքները: ՀՀ ԶՈւ գլխավոր շտաբի պետը հավաքի մասնակիցներին է ներկայացրել նաև հայ-ադրբեջանական սահմանագոտում առկա իրադրությունն ու տարածաշրջանի ռազմաքաղաքական իրավիճակը:

Պետական բարձրաստիճան պաշտոնյաների համար 2009 թվականից ի վեր կազմակերպվող ամենամյա հավաք-պարապմունքների նպատակն է ամրապնդել ռազմական անվտանգության համակարգում պետական բոլոր կառույցների փոխգործակցությունը, ինչպես նաև պետական կառավարման համակարգի ներկայացուցիչների շրջանում բարձրացնել ռազմական անվտանգության ապահովման գործում պաշտոնական պարտականությունների և իրավասությունների վերաբերյալ իրազեկվածության մակարդակը: