Ադրբեջանում ձերբակալել են Meydan TV-ի հրապարակախոսի եղբայրներին

Ադրբեջանում շարունակվում են արտասահմանում գործող միակ անկախ ադրբեջանական ինտերնետային Meydan TV հեռուստաալիքի աշխատակիցների դեմ բռնություններն ու հետապնդումները:

Ինչպես հաղորդում է «Թուրան» լրատվական գործակալությունը, երեկ ձերբակալվել են հեռուստաալիքի հրապարակախոս եւ խմբագիր Գյունել Մովլուդի երկու եղբայրները, որոնք բնակվում են Ադրբեջանից դուրս:

Ադրբեջանի ՆԳՆ մամուլի ծառայությունը հաստատել է լուրը: Մամուլի ծառայության աշխատակից Էհսան Զահիդովը հայտնել է, որ Գյունելի եղբայրներին' Վեքիլ եւ Ռաջի Իմանովներին ոստիկանությունը հոկտեմբերի 13-ին ձերբակալել է «օպերատիվ տեղեկատվության» հիման վրա: Առաջինը ձերբակալվել է Բիլասուվարում, երկրորդը' Սումգայիթում:

«Խուզարկության ժամանակ, նրանց մոտ մարիխուանա տեսակի թմրանյութ է հայտնաբերվել»,- ասել է Զահիդովը' նշելով, որ փաստի առնչությամբ հետաքննություն է տարվում:

«Թուրան»-ը հաղորդում է, որ Գյունել Մովլուդի եղբայրները ամեն աշխատանք կատարող բանվորներ են եւ ապրուստը վաստակում են որպես վարձու աշխատողներ: Թմրանյութեր պահելու եւ տարածելու համար նրանց մի քանի տարվա ազատազրկում է սպառնում:

Գյունել Մովլուդը հայտնի է Ադրբեջանի իշխանությունների հասցեին քննադատական հրապարակումներով:

Բոլոր անձինք, ովքեր որեւէ առնչություն ունեն Meydan TV հեռուստաալիքի հետ Ադրբեջանում, ենթարկվում են ճնշման եւ եւ հետապնդումների արդեն մի քանի շաբաթ: Երկու շաբաթ առաջ Բաքվի ոստիկանությունը բերման եւ հարցաքննության էր ենթարկել հեռուստաալիքի գլխավոր խմբագիր Էմին Միլլիի հարազատներին եւ ստիպել գրավոր հրաժարվել նրանից: Անցյալ շաբաթ անակնկալ կերպով հարցաքննության են ենթարկվել հեռուստաալիքի Բաքվի եւ Սումգայիթի աշխատակիցները: Դա կապված է ընդդիմադիր, Բեռլինում գործող այդ համացանային ռեսուրսի գործունեությունը դադարեցնելուն ուղղված իշխանությունների ջանքերի հետ:

Ադրբեջանի «Մուսավաթ» կուսակցությունը դատապարտել է Meydan TV հեռուստաալիքի դեմ բռնաճնշումների արշավը: Կուսակցության կողմից այդ մասին տարածված հայտարարության մեջ պահանջվում է անհապաղ ազատ արձակել Գյունել Մեվլուդի եղբայրներին:

Ընտանիքի հաղորդմամբ' եղբայրների ձերբակալությունն իրականացվել է ադրբեջանական իշխանությունների կողմից մշակված բռնաճնշումների դասական կանոններով: Գաղտնիք չէ, որ եղբայրները ձերբակալվել են, որպեսզի պատժեն նրա քրոջը, ասվում է «Մուսավաթ»-ի կողմից այսօր տարածած հայտարարության մեջ:

Հայտարարության մեջ նաեւ նշվում է, որ Meydan TV հեռուստաալիքի աշխատակիցների նկատմամբ ճնշումը, նրանց հարցաքննությունների կանչելը, նրանց ազգականների ձերբակալությունն եւ հետապնդումն Ադրբեջանի իշխանությունների բռնաճնշումների կոշտ բնույթի ցուցանիշն է: