«Յա պրաստոյ դերեվյաննի պարեն…». Մալիշկացի Արա Աբրահամյանի հաջողության գաղտնիքը

«Ժողովուրդ» թերթը գրում է. «Այսպիսով, կարող ենք արձանագրել, որ ամիսներ շարունակ շրջանառվող լուրերն այն մասին, որ Ռուսաստանի հայերի միության նախագահ Արա Աբրահամյանը ցանկանում է Հայաստանում կուսակցություն հիմնել և մասնակցել 2017 թվականի Աժ ընտրություններին, երեկ պաշտոնապես հաստատվեցին։ Իհարկե, նախկինում էլ են եղել դեպքեր, երբ դրսում ապրող մեծահարուստ հայերը Հայաստան են եկել և փորձել են քաղաքականությամբ զբաղվել, սակայն, որպես կանոն, այդ փորձերը ձախողվել են։ Ուստի հարց է ծագում՝ իսկ ինչի վրա է Աբրահամյանը հույսը դրել, հավանաբար նա կարծում է, որ նախորդները ձախողվել են, քանի որ ընդդիմադիր են եղել, իսկ իրեն ամենավառ երևակայությամբ անգամ չեն կարող ընդդիմադիր համարել: Նա մարդ է, որը երկու նախագահ ունի՝ առաջինն, իհարկե, Վլադիմիր Պուտինն է, և միայն երկրորդը՝ Սերժ Սարգսյանը: Աբրահամյանը նույնիսկ երկու ազգություն ունի՝ անձնագրով ռուս է, իսկ արտաքինով հայ։ Մի խոսքով մարդը ամեն ինչից լիքը ունի, այժմ որոշել է կուսակցության ստեղծել։ Դե, տուն է, թող լինի սկզբունքով։

Սեփական օլիգարխների քաղաքական նկրտումները քիչ էին Հայաստանին, այժմ էլ արտերկրի հայ-օլիգարխներն են փորձում այստեղ ինքնահաստատվել՝ ընդ որում, ՀՀ մի շարք օրենքներ խախտելով։ Այնպես որ, կարճ ժամանակ հետո Աբրահամյանը կհասկանա, որ իր երկու նախագահներով հանդերձ Հայաստանի քաղաքական դաշտում անելիք չունի։

Հիշեցնենք՝ մամուլում բազմիցս է գրվել, թե ինչպես է հաջողվել Արա Աբրահամյանին Ռուսաստանում մեծ դիրքեր զբաղեցնել։ «Մալիշկացի խեղճուկրակ երիտասարդ Արան իր շատ հայրենակիցների նման գյուղի բարիքները տարել է Ռուսաստան՝ ծախելու, գործի բերումով մտել է ռուսական բարձրաստիճան մի չինովնիկի մոտ ու նրա բարեհաճությունը ստանալու համար՝ ուզել է ուղղակի ասել, որ օգնի իիեն, որ բազմանդամ ու կարիքավոր ընտանիքից է։ «Յա պրաստոյ դերեվյաննի պարեն…» բառերը լսելով՝ ռուս չինովնիկը ծիծաղից թուլացել է ու հավանել տղային։ Հետո գործերը հալած յուղի պես են գնացել»» ։

Մանրամասները՝ թերթի այսօրվա համարում։