Իրանը 1980-ական թվականներին դիտարկում էր միջուկային զենք ստեղծելու հնարավորությունը. Ռաֆսանջանի

Իրանը 1980-ական թվականներին՝ Իրաքի հետ պատերազմի ժամանակ, դիտարկում Էր միջուկային զենք ստեղծելու հնարավորությունը, սակայն այդ պլանները չիրագործվեցին: Այդ մասին իրանական մամուլին տված հարցազրույցում հայտարարել է Իրանի նախկին նախագահ Ալի Աքբար Հաշեմի Ռաֆսանջանին:

«Երբ մենք ձեռնամուխ եղանք միջուկային ծրագրին, մենք պատերազմ Էինք մղում, եւ ցանկանում Էինք տարբերակ ունենալ այն դեպքում, եթե հակառակորդը միջուկային զենք կիրառի,- Հաշեմիի խոսքը մեջբերել է Reuters գործակալությունը:- Մենք այդպես մտածում էինք, բայց դա չիրագործվեց»:

«Մեր հիմնական դոկտրինան միշտ էլ եղել է ատոմի խաղաղ օգտագործումը, բայց մենք միշտ հաշվի Էինք առնում, որ եթե մեզ սպառնան, եւ դա անհրաժեշտ դառնա, մենք պետք Է գնանք այդ ուղիով»,- հավելել է Իրանի գործադիր իշխանության նախկին ղեկավարը՝ նկատի ունենալով միջուկային զենքի ստեղծման հնարավորությունը:

Հաշեմի Ռաֆսանջանին հարցազրույցի ժամանակ պատմել է, որ Իրաքի հետ պատերազմի ընթացքում ինքն այցելել է Պակիստան, որպեսզի փորձի հանդիպում անցկացնել երկրի միջուկային ծրագրի ղեկավար Աբդուլ Քադիր Խանի հետ: Սակայն նրան չի հաջողվել հանդիպել գիտնականի հետ:

Ալի Աքբար Հաշեմի Ռաֆսանջանին Իրանի նախագահի պաշտոնն զբաղեցրել է 1989-1997 թվականներին, 1980-89 թվականներին նա խորհրդարանի խոսնակն էր: Իրաքի եւ Իրանի միջեւ պատերազմը շարունակվել Է 1980-ից մինչեւ 1988 թվականը, հաղորդել է ՏԱՍՍ գործակալությունը: