ԻՊ-ից փախած հրամանատարը կառույցի և Թուրքիայի սերտ հարաբերությունների մասին

«Իսլամական պետություն» (ԻՊ) ահաբեկչական խմբավորումից փախած հրամանատար Սաիդը, որը եղել է Սիրիայի Ալ Բաբ քաղաքի ԻՊ-ի հետախուզության վարչության պետը, պատմել է կառույցի և Թուրքիայի սերտ կապերի, խմբավորման մեջ թուրք մարտիկների, Թուրքիայի տարածքով ահաբեկիչների Սիրիա անցումների, թուրքական հետախուզության և ԻՊ-ի հետ հարաբերությունների, ԻՊ-ի հետախուզական աղբյուրների մասին:

Ինչպես հաղորդում է «Արմենպրես»-ը, թուրքական «Ջումհուրիեթ» թերթի թղթակցի հետ զրույցում Սաիդն ասել է, որ ԻՊ-ին միանալ ցանկացող մարտիկների համար Թուրքիան «բաց սահման» քաղաքականություն է իրականացրել: Նրա խոսքով՝ քանի որ սիրիացի քրդերը ներկայումս վերահսկողության տակ են առել Թել Աբյադ քաղաքը, այժմ Սիրիա անցնել ցանկացող ԻՊ-ի մարտիկներն օգտվում են միայն Թուրքիայի Քիլիս քաղաքի սահմանադռնից:

Նա ասել է, որ և’ Ալ Նուսրան (Ալ Կաիդա), և’ ԻՊ-ը շարունակում են մարտիկներ մատակարարել Քիլիսից:

«Քիլիսում նույնիսկ երկու մզկիթ կա, որոնցից մեկը «Ալ Քաիդա»գնացողների, մյուսը՝ ԻՊ գնացողներ համար է օգտագործվում: Այդ երկու մզկիթում երկու խմբավորումների ներկայացուցիչներ կան, որոնք էլ կազմակերպում են մարտիկների անցումները Սիրիա և Իրաք»,- ասել է նա:

Սաիդը պատմել է, որ իրենք որևէ խնդիր չեն ունեցել թուրքական հետախուզության հետ համագործակցության մեջ:

«Քոբանիի վրա հարձակումներում մենք մեծ թվով վիրավորներ ունեցանք, որոնք բուժման համար թուրքական հետախուզության ջանքերով փոխադրվեցին Թուրքիա: Ավտոմեքենաներում մեր վիրավորների մազերը կտրում ու մորուքները սափրում էին, որպեսզի թուրքական հիվանդանոցներում բժիշկների մոտ կասկածներ չառաջանային: Թուրք-սիրիական սահմանին գտնվող Ալ Ռաի քաղաքում ԻՊ-ի ղեկավարը թուրք հետախույզ է: ԻՊ-ի կազմում թուրքական հետախուզության հետ սերտ կապեր ունեցող բազմաթիվ մարդիկ կան»,- ասել է նա: