Օլանդն շտապ խորհրդակցություն է հրավիրել՝ Սեն Դենիում ծավալված հատուկ գործողության կապակցությամբ

Ֆրանսիայի նախագահ Ֆրանսուա Օլանդն շտապ խորհրդակցություն է գումարել Ելիսեյան պալատում: Պետության ղեկավարը վարչապետի և ներքին գործերի նախարարի հետ միասին հետևում է Փարիզի հյուսիսային արվարձանում՝ Սեն Դենիում, ծավալված հատուկ գործողությանը, տեղեկացնում է «Արմենպրես»-ը:

Գործողության նպատակը 28-ամյա Աբդուլհամիդ Աբաուդին բռնելն է, որը նոյեմբերի 13-ին Փարիզում կատարված ահաբեկչական գործողությունների ենթադրյալ կազմակերպիչն է: Եթե Աբաուդի գործունեության վերաբերյալ հետաքննության ենթադրությունները ճիշտ են, ապա ստացվում է, որ առավել փնտրվող ահաբեկիչներից մեկը, որը պատրաստություն է անցել Սիրիայում, թաքնվում էր «Ստադ դե Ֆրանսից»՝ Փարիզի գլխավոր մարզադաշտից ընդամենը 800 մետր հեռավորության վրա, որտեղ անցած ուրբաթ օրն իրականացված ահաբեկչական գործողությունները 129 մարդու կյանք խլեցին:

Ինչպես հայտնել են Ելիսեյան պալատում, նախագահ Օլանդը գործողության սկսվելու մասեն իրազեկվել է տեղական ժամանակով ժամը 04:30-ին:

Ներկա պահին հայտնի է, որ ոստիկանության գործողությունների շնորհիվ ոչնչացվել է ենթադրյալ երկու ահաբեկիչ. նրանցից մեկը սպանվել է ուժայինների կողմից, մյուսը՝ կին, բռնվելուց առաջ կարողացել է գործի դնել պայթուցիկ սարքը և պայթեցնել իրեն: Նրանց անձերի մասին չի հաղորդվում: Եվս հինգ մարդ ձերբակալված է, նրանք արդեն ցուցմունքներ են տալիս: Նաև հակասական տեղեկություններ են ստացվել մի անցորդի զոհվելու մասին, որը պատահաբար հայտնվել է փոխհրաձգության շրջանում:

Ինչպես նշում են ականատեսները, սաստիկ հրաձգությունը Սեն Դենիում շարունակվել է առվնազն մեկ ժամ: Չարագործները շատ լավ զինված են եղել: Ստացված տեղեկատվության համաձայն՝ Ֆրանսիայի հատուկ նշանակության ուժերի մի քանի աշխատակիցներ վերքեր են ստացել:

Ոստիկանության պրեֆեկտուրան փակել է Սեն Դենիի բոլոր դպրոցներն ու մյուս ուսումնական հաստատությունները: Իրադարձությունների էպիկենտրոնից մեկ կիլոմետր շառավղով փակ են խանութները: Բնակիչներին արվգելված է դուրս գալ տներից: Ավտոմեքենաների և ցամաքային ու ստորգետնյա հանրային տրանսպորտի երթևեկությունը դադարեցված է: Ոստիկանությունը չի բացառում, որ մոտակայքում կարող են գտնվել ոչնչացված անձանց հանցակիցները, հաղորդել է ՏԱՍՍ-ը: