Ստրոս-Կանի «գլխին սարքել են». Guardian

Ֆրանսիայի նախագահական ընտրությունների երկրորդ փուլից մեկ շաբաթ առաջ Դոմինիկ Ստրոս–Կանը քաղաքական լարվածությանը նոր թափ է հաղորդել։

Guardian–ին տված հարցազրույցում, Արժույթի միջազգային հիմնադրամի նախկին ղեկավարը պնդել է, որ աջ ուժերի կողմից հովանավորված Նյու Յորքի «Սոֆիտել» հյուրանոցի աղախնին բռնաբարության փորձի մեջ մեղադրանքը, սկսվող նախագահական ընտրությունների մրցավազքից իրեն դուրս մղելու նպատակ է հետապնդել։

Ստրոս–Կանի խոսքերով՝ ինքը չի կասկածում, որ դեպքերի այլ ընթացքի դեպքում ինքը կարող էր դառնալ Սոցիալիստական կուսակցության թեկնածուն և գործող նախագահ ու 2-րդ ժամկետի համար պայքարող Նիկոլա Սարկոզիի ամենավտանգավոր մրցակիցը։

Ինչպես նշում է Euronews–ը, Guardian–ի այս հրապարակումը համընկել է երկուշաբթի ամերիկացի լրագրող Էդվարդ Ջեյ Էպշտեյնի հեղինակած գրքի շնորհանդեսի հետ, որում լուրջ տեղեկություններ կան «Սոֆիտելի» գործով հետաքննության մասին։ Մասնավորապես նշվում է, որ Ստրոս–Կանի գործով մի շարք հանգամանքներ ենթադրելու տեղիք են, որ «դա իրականացվել է պրոֆեսիոնալների ձեռքով»։