Իրանի տնտեսությունը «լավ յուղման կարիք ունի». Ռոուհանի

Իրանն այժմ կարող է իր տնտեսության մեջ կատարել 50 միլիարդ դոլարի սեփական ներդրումներ՝ առանց արտասահմանյան կապիտալ ներդրումների: Այս մասին, ինչպես տեղեկացնում է «Արմենպրես»-ը, հայտարարել է Իրանի նախագահ Հասան Ռոուհանին՝ ելույթ ունենալով երկրի բիզնեսի և գործարար շրջանների ներկայացուցիչների մասնակցությամբ «Գործողությունների համատեղ համապարփակ պլանը. նոր դարաշրջանի սկիզբ Իրանում» խորհրդաժողովում:

«Իրանն ունի 50 միլիարդ դոլարի սեփական ներդրումային ներուժ, որն ինքը կարող է ներդնել սեփական արտադրությունների զարգացման բնագավառում, առանց դիմելու արտասահմանյան կապիտալ ներդրումների»,- ընդգծել է Իրանի նախարարների կաբինետի ղեկավարը:

Խոսելով Իրանի նկատմամբ պատժամիջոցների վերացման մասին՝ Ռոուհանին Իրանի տնտեսության ներկայիս վիճակը համեմատել է «բանտարկությունից դուրս եկած մարդու հետ, որի շղթաները հանել են»: Բայց ըստ որում «նրա ոտքերին տակավին մնում են ծանրաքարերը»: Տնտեսության գլխավոր խնդիրներից մեկն, Իրանի նախագահի կարծիքով, թուլացած և դանդաղաշարժ բանկային համակարգն է: Ռոուհանիի խոսքով՝ Իրանի տնտեսությունը՝ որպես մեխանիզմ, լավ յուղման կարիք ունի» արդյունավետ ֆինանսական հատվածի տեսքով: Միաժամանակ նա երկրի հիմնական սոցիալական խնդիրներ է համարել գործազրկությունը և ծնելիության նվազումը, հաղորդել է ՏԱՍՍ գործակալությունը: