Ադրբեջանի ղարաբաղյան պատերազմի հաշմանդամները պատրաստվում են բողոքի ակցիայի

Մանաթի մոտ 100 տոկոսով արժեզրկումն ավելի է խորացրել Ադրբեջանի բնակչության մեծամասնության խնդիրները: Ինչպես միշտ, ավելի շատ տուժել են քաղաքացիների խոցելի շերտերը՝ թոշակառուները, բազմանդամ ընտանիքները, հաշմանդամները, միայնակ մայրերը:

Ադրբեջանի կառավարությունը օրերս 10 տոկոսով ավելացրել է աշխատանքային թոշակների բազային մասը, ինչպես նաև, այսպես կոչված, նախագահական թոշակը՝ Հայրենական մեծ պատերազմի հաշմանդամների համար:

Ինչպես հաղորդում է «Արմենպրես»-ը՝ վկայակոչելով «Ազադլըգ» թերթը, Ղարաբաղյան պատերազմի հաշմանդամների հասարակական միության ղեկավար Էթիմադ Ասադովը հայտնել է, որ իշխանությունները մոռացել են ղարաբաղյան պատերազմի հաշմանդամներին, քանի որ թոշակների բարձրացումը նրանց վրա չի տարածվել:

Նրա խոսքով՝ չնայած թոշակների 10 տոկոսով բարձրացումը հատկապես հաշմանդամների խնդիրները չի լուծում, սակայն, ղարաբաղյան պատերազմի հաշմանդամներին նման բարձրացումից զրկելը ոչ միայն ավելի է խորացնում նրանց կարիքները, այլև վիրավորում է ղարաբաղյան պատերազմում արյուն թափած և հաշմանդամ դարձած 11 հազարից ավելի մարդկանց, որոնց թոշակի մեծ մասն այսօր գնում է թանկացած դեղամիջոցներ ձեռք բերելու վրա:

«Մանաթի արժեզրկումից հետո դեղերի գները երկու անգամ բարձրացել են, և շատ դեղամիջոցներ մեզ համար անհասանելի են դարձել: Ղարաբաղյան պատերազմի հաշմանդամների մեծ մասը գտնվում է շատ վատ վիճակում»,- թերթին հայտնել է Հայրենական պատերազմի հաշմանդամների հասարակական միության ղեկավար Ֆիրուդին Մամեդովը:

Թերթը գրում է, թե առաջին անգամը չէ, որ Ադրբեջանի իշխանությունն անտեսում է ղարաբաղյան պատերազմի հաշմանդամներին, և դա արվում է ոչ միայն նախագահական մակարդակով, այլև իրեն բացահայտ ցույց է տալիս բոլոր բնագավառներում:

Ըստ թերթի՝ Ադրբեջանի «Հաշմանդամների սոցիալական պաշտպանության մասին» օրենքով խորհրդային բանակում ծառայությունից հետո Ղարաբաղում հաշմանդամ դարձած զինծառայողների կարգավիճակը դեռ 10 տարի առաջ հավասարեցվել է ժամկետանց՝ պայմանագրային զինծառայողների կարգավիճակին, սակայն, այդ որոշումը մինչ այժմ թաքցվում է ղարաբաղյան պատերազմի հաշմանդամներից, և նրանց արյան փողը յուրացնում են ֆինանսական ու ապահովագրական մարմինները:

«Ղարաբաղյան պատերազմի հաշմանդամների խնդիրները բազմաթիվ են: Այդ խնդիրներով չի զբաղվում նաև Ադրբեջանի օմբուդսմենը: Այդ է պատճառը, որ ղարաբաղյան պատերազմի հաշմանդամները որոշել են հունվարի 30-ին երթ կատարել Նախագահական նստավայր և բողոքի ակցիա անցկացնել»,- գրում է թերթը՝ չբացառելով, որ իշխանությունները, հնարավոր, այն արգելելու պատրվակ գտնեն: