Մոսկվայի բորսայում դոլարի փոխարժեքը գերազանցել է 83 ռուբլին

Հունվարի 21-ին Մոսկվայի բորսայում սակարկությունների մեկնարկից հետո աճել են դոլարի և եվրոյի փոխարժեքները, ռուբլին ճնշման տակ է գտնվում նավթի գնաանկման պատճառով: Դոլարի փոխարժեքը գերազանցել է 83 ռուբլու նշագիծը, իսկ եվրոն նորացրել է 2014 թվականից ի վեր առավելագույն ցուցանիշը:

Երևանի ժամանակով ժամը 11:09-ին դոլարի փոխարժեքը հասել է 83,007 ռուբլու՝ նախորդ փակման նշագծի նկատմամբ ավելանալով 1,61 ռուբլով: Եվրոյի փոխարժեքը հասել է 90,57 ռուբլու՝ ավելանալով 1,75 ռուբլով: Հաջորդ րոպեներին արժույթները նշված մակարդակներից նահանջել են 10-15 կոպեկով:

Ռուբլու վրա ճնշումը ուժեղ մնում նավթի համաշխարհային գների շարունակվող անկման պատճառով: Նավթի գինը նորացրել է 2003 թվականից ի վեր նվազագույն ցուցանիշը՝ հունվարի 20-ի երեկոյան իջնելով բարելի դիմաց 27 դոլարի նշագծից:

Տարեսկզբից նավթն էժանացել է 24 տոկոսով: Լոնդոնի ICE բորսայում Brent նավթի մարտյան ֆյուչերսների գնանշումը հունվարի 21-ին Երևանի ժամանակով ժամը 11:00-ի դրությամբ նվազել է մոտավորապես 0,5 տոկոսով և կազմել բարելի դիմաց 27,7 դոլար:

Մինչդեռ ՌԴ ֆինանսների նախկին նախարար Ալեքսեյ Կուդրինն այն կարծիքին է, որ նավթի գները դեռևս չեն հասել ցածրակետին: «Դա կարող Է լինել բարելի դիմաց ե՛ւ 18, ե՛ւ 16 դոլար, բայց ոչ երկար ժամանակ, այնուհետև, իհարկե, գները կբարձրանան»,- ասել է Կուդրինը՝ Դավոսում ընթացող Համաշխարհային տնտեսական համարժողովի շրջանակներում ելույթ ունենալով «ՎՏԲ Կապիտալի» նախաճաշի ընթացքում, հաղորդել է «Ինտերֆաքս»-ը: