ԱՄՆ 11 նահանգում արտակարգ դրություն է հայտարարված

Միացյալ Նահանգների Արևելյան ափի արդեն 11 նահանգում հայտարարվել է արտակարգ դրություն' կապված ձյան չդադարող տեղումների հետ: Ինչպես հաղորդում է «Արմենպրես»-ը, այս մասին տեղեկացնում է «ՌԻԱ Նովոստի»-ն:

Հունվարի 22-ին և 23-ին չեղյալ են հայտարարվել ինքնաթիռների ավելի քան 7100 չվերթներ: Հյուսիսային Կարոլինայում և մայրաքաղաք Վաշինգտոնում օրվա երկրորդ կեսից փակված են խոշոր օդանավակայանները: Մայրաքաղաքում մինչև հունվարի 25-ը դադարեցվել է հասարակական տրանսպորտի շարժը:

Ձյան մաքրման աշխատանքներին մասնակցում են հազարավոր մեքենաներ: Առատ տեղումների հետևանքով Վիրջինիայում գրանցվել է ավելի քան 900 ճանապարհատրանսպորտային պատահար:

Օդերևութաբանները նախապես կանխատեսել էին մինչև 60 սմ ձյան տեղումներ Վաշինգտոնում, սակայն գիտնականներն այժմ չեն բացառում մինչև 90 սմ տեղումների հավանականությունը:

ԱՄՆ մյուս նահանգներում ձյան տեղումները համեմատաբար ավելի քիչ կլինեն: Նյու Յորք և Նյու Ջերսի նահանգների մի շարք շրջաններում կա ջրհեղեղի վտանգ: