Հայաստանը պատրաստ է շարունակել համագործակցությունը ԵՄ հետ

Հայաստանը պատրաստ է շարունակել և խորացնել ԵՄ հետ համագործակցությունը: Այս մասին լրագրողների հետ ամփոփիչ ասուլիսի ժամանակ հայտնել է ՀՀ արտաքին գործերի նախարար Էդվարդ Նալբանդյանը:

«Մենք հայտարարեցինք Եվրամիության հետ բանակցությունները մեկնարկելու մասին, ինչից հետո կայացավ բանակցությունների առաջին փուլը: Պայմանավորվածություն է ձեռք բերվել մինչև այս տարվա վերջ հետագա փուլերի ժամանակացույցի վերաբերյալ:

Նախապատրաստվում են նոր բարձրաստիճան այցելություններ, որոնք կլինեն թե՛ Հայաստան, թե՛ Բրյուսել: Դրանց արդյունքում կարող ենք նոր պայմանավորվածություններ ձեռք բերել և մեր հարաբերություններն առաջ մղել տարբեր ուղղություններով»,- նշեց Նալբանդյանը:

ՀՀ արտգործնախարարը հերթական անգամ հիշեցրեց Եվրամիության հետ համագործակցությունը շարունակելու Հայաստանի պատրաստակամությունը: «Մեկ բան ակնհայտ է. Հայաստանը բազմիցս ասել է և մնում է այն դիրքորոշմանը, որ մենք ԵՄ հետ պատրաստ ենք շարունակել ընթանալ առաջ, ամրապնդել, խորացնել համագործակցությունը բոլոր հնարավոր ուղղություններով և ձևաչափերով, որով ԵՄ պատրաստ կլինի' հաշվի առնելով մեր հանձնառություններն այլ ինտեգրացիոն գործընթացներում»,- ասաց նա: