Հեղինակազրկված է ընդհանրապես իշխանական ինստիտուտը

ՀՀԿ-ական պատգամավորները մի տեսակ ծանր են տանում ՀՅԴ-ական Արմեն Ռուստամյանի երեկվա ասածը, թե իշխանությունները հեղինակազրկված են: Այսօր հերթով փորձում են արձագանքել, հակադարձել գրեթե կոալիցիոն գործընկերոջը, բայց մի՞թե ինչ-որ տարօրինակ բան է ասել: Վերջապես նա պարզ ասել է, որ իշխանությունները հեղինակազրկված են, և դա մեր բոլորիս խնդիրն է: Եվ իրականում այդպես էլ կա՝ իշխանությունների հեղինակազրկման պրոցեսը նոր չի մեկնարկել, այլ՝ 25 տարի առաջ և արդեն 25 տարի է՝ այն ընթանում է: Իշխանությունների հեղինակազրկման մեջ մեղավոր է գրեթե ամբողջ քաղաքական դաշտը, որովհետև գրեթե բոլոր էական դեր կատարող քաղաքական ուժերն էլ ինչ-որ փուլում եղել են իշխանության կազմում, և 25 տարվա ընթացքում Հայաստանի իշխանությունները չեն կարողացել գոհացնել ժողովրդին, չեն աշխատել արդյունավետ:

Այդ վիճակը տարեցտարի հասունացել է, և այսօր ունենք այն, ինչ ունենք՝ հեղինակազրկված է ընդհանրապես իշխանական ինստիտուտը, հիմա ոչ թե պետք է վատ զգալ նման հայտարարություններից ու իրար դեմ ակնարկներ անել, այլ հետևություններ անել, որ պետք է ինչ-որ բաներ փոխվեն, մտածել, թե ինչպես փորձել վերականգնել այդ հեղինակությունը:

Կարեն Վարդանյան