Քաղաքագետ Սուրեն Սուրենյանցը 8 օր է՝ գտնվում է հացադուլի և ջրադուլի մեջ

Հասարակություն 8 Փետրվար, 2016 13:25

Երևանի «Նուբարաշեն» քրեակատարողական հիմնարկում գտնվող քաղաքագետ, 4 տարվա ազատազրկման դատապարտված Սուրեն Սուրենյանցն արդեն 8 օր է՝ գտնվում է հացադուլի և ջրադուլի մեջ:

ԼՈւՐԵՐ.com-ի թղթակցի հետ զրույցում Սուրենյանցի կինը՝ Արփին ասաց, որ հացադուլի և ջրադուլի պատճառը Սուրենյանցի նկատմամբ իրականացվող ապօրինի գործողություններն են: Սուրենյանցը դեռևս չի պատրաստվում դադարեցնել հացադուլն ու ջրադուլը և այդ կերպ պահանջում է փոխել խափանման միջոցը՝ գրավի դիմաց ազատ արձակելով:

Դեկտեմբերի 22-ի դատի ժամանակ դատավոր Արմեն Բեկթաշյանը չեղյալ է համարել որպես գրավ վճարված մեկ միլիոն դրամը, և հենց դատարանի դահլիճից կալանավորել են Սուրենյանցին՝ դատապարտելով 4 տարվա ազատազրկման:

«Մենք հաջորդ օրը ցանկացանք մեր մուծած գրավը ետ վերցնել, որպեսզի գոնե տուժողների մի մասի գումարը փոխհատուցվի, սակայն մեզ այդ մեկ միլիոնը չեն վերադարձնում՝ պատճառաբանելով, որ պետք է վերաքննիչ դատարանից բողոքարկման պատասխանը ստանանք, նոր վերադարձնեն, բայց նման կարգ գոյություն չունի: Բազմաթիվ իրավաբաններից ենք հետաքրքրվել»,- ասում է Արփին և հավելում,- դեկտեմբերի 22-ից հինգ հետո օր հետո գործը պետք է ուղարկվեր Սուրենյանցին և դատապաշտպանին, որպեսզի կարողանայինք բողոքարկել վերաքննիչ քրեական, բայց իրենք չեն ուղարկում գործը»:

Մեր զրուցակիցն ասաց, որ 16 օր շարունակ ինքն անընդհատ զանգահարում է՝ ճշտելու արդյոք գործն ուղարկվա՞ծ է, թե՞ ոչ, սակայն աշխատակիցը՝ Գեորգին, անընդհատ հետաձգում է. «Այսօր կուղարկեմ, վաղը կուղարկեմ, մի ժամից կուղարկեմ, հինգ րոպեից կուղարկեմ: Վերջը չդիմացա՝ զանգահարեցի Կենտրոն և Նորք Մարաշի կենտրոնական գրասենյակ, որտեղից ինձ ասացին, որ Սուրենյանցի բողոք կա, բայց պետք է Արմեն Բեկթաշյանի գրասենյակից գործը ուղարկեն: Նորից զանգ եմ տալիս այդ ստախոսին, ասում եմ՝ ինչի՞ համար եք սուտ խոսում, ինձ պատասխանում է, որ ես դատավարության կողմ չեմ և անջատում է հեռախոսը: Ես բազմիցս զանգահարեցի, բայց նա իմ համարին չի պատասխանում»,- ասաց նա:

«Դատավորն անձնական թշնամանք ունի Սուրենյանցի հանդեպ, նա նույնիսկ հաշվի չառավ, որ Սուրենյանցն ընտանիքի միակ կերակրողն էր և իր հոգածության տակ ունի մանկահասակ երեխա»,- ասաց Սուրենյանցի կինը: