Շատ կուզենայի ապրել տարիներ առաջվա Հայաստանում, որտեղ լրագրողները միմյանց պաշտպանում էին, հարգում ու վստահում. Թագուհի Թովմասյան

Ժողովուրդ օրաթերթի գլխավոր խմբագիր Թագուհի Թովմասյանը ֆեյսբուքյան իր էջում գրել է.

«Միշտ առիթ ունեցել եմ ասելու, որ մեր' գերհագեցած լրատվական դաշտում լրագրողական էթիկայի մասին, ցավոք, վաղուց մոռացվել է: Լրագրողական համերաշխություն ասվածը այլեւս դարձել է հնացած կատեգորիա: Մի տեսակ փոխվել է լրագրության մասին պատկերացումը: Լրագրողներին վստահելը անիմաստ է դարձել, քանի որ շատերի համար ինֆորմացիայի աղբյուրը ոչ թե ազնիվ աշխատանքային գործիք է համարվում, այլ այսպեսասած «հակառակորդ» թիմի մոտ դիվիդենտներ շահելու առիթ: Ու եթե կան լրագրողներ, որոնք պատրաստ են իրենց աղբյուրի հետ ունեցած գրագրությունը հրապարակել' նույնիսկ արդարանալու համար, ապա պետք է պատրաստ լինեն, որ մի օր էլ իրենց կամքից անկախ նման մի բան կարող է տեղի ունենալ: Թեեւ մյուս կողմից էլ անթուլատրելի է ուրիշի գրագրությունը անհայտ աղբյուրներով ձեռք բերելն ու հրապարակելը: Իսկապես ցավալի իրավիճակ է:
Բայց չմոռանանք, որ այսօր երկու բեւեռներում կանգնած լրագրողներից մեկը 2008-ի մարտի 1-ին իր կյանքը վտանգելով դեպքի վայր էր գնացել' հասարակությանը տեղեկություն հաղորդելու անկեղծ ցանկությամբ, իսկ մյուսը նախորդ տարի Բաղրամյան պողոտայում ծեծի ենթարկվեց' իր աշխատանքը կատարելիս:
Շատ կուզենայի ապրել տարիներ առաջվա Հայաստանում, որտեղ լրագրողները միմյանց պաշտպանում էին, հարգում ու վստահում»: