Տեսողության խնդիրները չեն խանգարում երեխաներին ինքնապաշտպանվել սովորել. նոր նախագիծ՝ առողջական խնդիրներ ունեցող երեխաների համար

Ազգային ավանդական կարատե-Դո Ֆուդոշին ասոցացիան նոր նախագծեր է սկսում: Նախագծերից առաջինի շրջանակներում ասոցացիան մարզումներ է իրականացնում տեսողության խնդիրներ ունեցող երեխաների հետ: Այս մասին ԼՈՒՐԵՐ.com-ի թղթակցի հետ զրույցում ասաց ասոցացիայի նախագահ Սերգեյ Խաչատրյանը:

«Մեկ տարի նախապատրաստվել ենք՝ ծրագիրն իրականացնելու համար: Արդեն երկու շաբաթ է, ինչ սկսել ենք մարզումները: Փորձեցինք և տեսանք, որ ստացվում է, քանի որ մեր մարզիչները հատուկ պատրաստություն են անցել: Տեսողության հետ կապված խնդիրները չեն խանգարում երեխաներին ինքնապաշտպանություն սովորելուն: Դեռևս կա 25 մասնակից: Կարծում եմ, սակայն, որ երեխաների քանակը կավելանա, որովհետև ցանկացողները շատ են»,- նշեց ասոցիացիայի նախագահը:

Հավելենք, որ մարզումներն իրականացվում են շաբաթական երեք օր:

Անդրադառնալով այլ նախագծերի իրականացմանը՝ ասոցացիայի նախագահն ավելացրեց. «Մեր ֆեդերացիան ակցիայի շրջանակներում պատրաստվում է անվճար դասընթացներ անցկացնել նաև աուտիզմով հիվանդ երեխաների, լսողական խնդիրներ ունեցողների, ինչպես նաև մանկատների և գիշերօթիկ դպրոցների երեխաների հետ»:

Բացի վերոնշյալ նախագծերից, Սերգեյ Խաչատրյանն ասաց, որ իրականացվում է նաև «Հայ զինվորի կողքին» ակցիան, որի շրջանակներում հարյուրից ավելի մարդ արյուն է տվել հայ զինվորներին: 

«Վիրուսների պատճառով հունվար-փետրվար ամիսներին դադար էինք տվել, սակայն մարտից կրկին կսկսենք ծրագիրը և ամեն ամիս կրկին կիրականացնենք այն»,- հավելեց Խաչատրյանը:

Նկատենք, որ նախագծերը շարունակական բնույթ է կրելու: 

JKS-ի անդամ (japan karate shoto federation) ասոցացիան այս ամսվա 29-ին կհյուրընկալի ճապոնական կարատեի Ռուսաստանի ֆեդերացիայի նախագահին, ով սեմինար-պարապմունքներ է անցկացնելու Հայաստանում՝ մարզիչների, մրցավարների և երեխաների համար: