Հրաձիգ Զավեն Իգիթյանը շատ մոտ էր մեդալին

Հունգարիայի Գիոր քաղաքում շարունակվում է հրաձգության Եվրոպայի առաջնությունը: Հայաստանի ներկայացուցիչները երեկ իրենց հաշվին վազող թիրախ երիտասարդ տղաների պայքարում գրանցեցին թիմային բրոնզե մեդալ: Հաջողությունները կարող էին շարունակվել նաև այսօր:

10մ, օդամղիչ ատրճանակ երիտասարդ տղաների վարժությունում 44 մրցակցից Զավեն Իգիթյանը խոցոց 571 միավոր և մրցաշարային աղյուսակի 7-րդ հորիզոնականով անցավ եզրափակիչ փուլ: Եզրափակիչ 8-նյակում նա հավակնում էր մեդալի. կրակոցները բավականին դիպուկ էին, սակայն մրցելույթն ավարտեց' տեղ գտնելով 4-րդ հորիզոնականում: Զավեն Իգիթյանի անձնական մարզիչն է հայրը' Խորեն Իգիթյանը: Զավենը «Հրաձգության հանրապետական մարզադպրոց»-ի սան է:

Վաղը Հայաստանի ժամանակով 15:30-ին Մարիամ Միքայելյանը և Իրինա Լաուերը կսկեն պայքարը օդամղիչ հրացան կանանց վարժությունում, Նորայր Առաքելյանը կսկսի պայքարը նույն օրը 19:30-ին օդամղիչ ատրճանակ տղամարդկանց վարժությունում: Վերոնշյալ վարժություններում խաղարկվում են Ռիո-2016-ի 3-ական օլիմպիական ուղեգրեր:

Հ. Գ.

Հունգարիայի Գիոր քաղաքում փետրվարի 22-28-ը տեղ է ունենում Եվրոպայի առաջնություն 10մ հեռավորությունից՝ հրացան, ատրճանակ, վազող թիրախ զենքաձևերից, որին մասնակցում է 47 երկրի 588 մարզիկ: Նախորդ տարվա համեմատ աճել է մասնակից երկրների ու մարզիկների քանակը: Եվրոպայի առաջնությանը խաղարկվում է Ռիո-2016-ի 12 օլիմպիական վարկանիշ: Վարկանշային են հրացան և ատրճանակ մեծահասակների վարժությունները' յուրաքանչյուր ձևից խաղարկվում է 3-ական վարկանիշ' կանանց և տղամարդկանց համար:

Եվրոպայի առաջնությանը Հայաստանից մասնացում է 14 մարզիկ' գլխավոր մարզիչ Սեյրան Նիկողոսյանի և ավագ մարզիչ Անդրանիկ Այվազյանի մարզչական ղեկավարությամբ: Հայաստանի հանրապետությունը Եվրոպայի առաջնությանը նման մեծ պավիրակությամբ առաջին անգամ է մասնակցում: Հայաստանի հավաքականը կազմված է Երևանի հրաձգության մանկապատանեկան մարզադպրոցի, Հրաձգության հանրապետական մարզադպրոցի և Գյումրու քաղաքապետարանի հրաձգության մարզադպրոցի սաներից: