Ուղեղի լվացք՝ Ռոբերտ Նազարյանի միջոցով

Տրամաբանությունն ընդհանրապես բնորոշ է էվոլյուցիա անցած բանական մարդուն և այն ունենալու համար պարտադիր չէ ակադեմիական կամ թեկուզ բարձրագույն կրթություն ունենալ, ուղղակի պետք է ընդունակ լինել մտածելու և թեկուզ ամենապրիմիտիվ հաշվարկները մտքում անելու: Օրինակ՝ մի շատ հասարակ բան ասեմ՝ էլեկտրաէներգիայի գինը բարձրացրին, որովհետև ՀԷՑ-ը պարքեր էր կուտակել, չէ՞: Հիմա կառավարությունը վարկ է վերցնում, որպեսզի այդ պարտքը մարի: Այսինքն՝ ՀԷՑ-ն էլ պարտք չի ունենա, հետևաբար՝ էլեկտրաէներգիայի գինը նորից պետք է իջնի: Սրանից էլ պարզ բա՞ն:

Վստահ եմ, որ նույնիսկ կրթություն չունեցողը սա հասկանում է: Այդ դեպքում ինչո՞ւ է Հանրային ծառայությունները կարգավորող հանձնաժողովի նախագահ Ռոբերտ Նազարյանը կրկին անմեղսունակի կեցվածք ընդունած՝ նորից ԱԺ-ում անորոշ կերպով հայտարարում, թե միայն ապրիլի վերջին է հնարավոր խոսել սակագնի վերանայման մասին: Սակագնի վերանայման մասին խոսելը, կարծում եմ, ավելորդ է, պարզապես պետք է վերանայել ու իջեցնել, քանի որ դա ավելի քան տրամաբանական է: Եվ եթե Ռոբերտ Նազարյանի միջոցով նորից շարունակում են մարդկանց ուղեղ լվանալու տեխնոլոգիաներ կիրառել, ապա չի բացառվում, որ ուրեմն էլի մի բան մտածել են մինչև այդ ապրիլի վերջը և էլի մի պատրվակ կգտնեն, որ սակագինը չիջնի: Իսկ կառավարության վերցրած վարկի մասին երևի մինչև այդ մարդիկ մոռացած էլ կլինեն:

Կարեն Վարդանյան