Սերժ Սարգսյանը, Սեյրան Օհանյանը, Յուրի Խաչատուրովը և այլք՝ մարշալ Համազասպ Բաբաջանյանի արձանի բացմանը (ֆոտոշարք, տեսանյութ)

Այսօր մայրաքաղաք Երևանի Ավան վարչական շրջանի Բաբաջանյան փողոցի հարակից պուրակում տեղի ունեցավ ԽՍՀՄ զրահատանկային զորքերի գլխավոր մարշալ Համազասպ Բաբաջանյանի արձանի բացման արարողությանը: Արձանի քանդակագործն է Համլետ Մատինյանը, ճարտարապետը՝ Միքայել Միսակյանը: 

Բացման արարողությանը ներկա էր նախագահ Սերժ Սարգսյանը, Պաշտպանության նախարար Սեյրան Օհանյանը, ԶՈՒ Գլխավոր շտաբի պետ Յուրի Խաչատուրովը, Երևանի քաղաքապետ Տարոն Մարգարյանը, Հայրենական պատերազմի վետերաններ, Եվրոպայում ԱՄՆ ցամաքային ուժերի հրամանատար գեներալ-գնդապետ Ֆրեդերիկ Բեն Հոջեսը, ԱՄՆ Կանզաս նահանգի ադյուտանտ-գեներալ, ազգային գվարդիայի նահանգի հրամանատար գեներալ-մայոր Լի Տաֆֆանելլին և օտարերկրյա պետությունների ռազմական կցորդներ, «Գարդման» հայրենակցական միության անդամներ, քաղաքացիներ այլք։

Բացման խոսքով հանդես եկավ նախարար Սեյրան Օհանյանը, ՀՀ վետերանների միության նախագահ Սիմոն Եսայանը։ Պատվո պահակախմբի զինվորների շարային քայլերթից հետո Երևանի պատվավոր քաղաքացի, գրոսմայստեր Ռաֆայել Վահանյանը և Հայաստանի շախմատային ֆեդերացիայի փոխնախագահ Հովիկ Խալիկյանը Սերժ Սարգսյանին հանձնեցին խորհրդանշական նվեր՝ մարշալ Բաբաջանյանին պատկանող շախմատը՝ ընծայված զորավարի ժառանգների կողմից: 

Պետք է նկատել, որ միջոցառման ժամանակ Սերժ Սարգսյանը Սեյրան Օհանյանի և Յուրի Խաչատուրովի հետ ինչ-որ բան էր խոսում՝ բավական խիստ դեմքով։

Լուսանկարները՝ ԼՈՒՐԵՐ.com-ի

Քրիստինա Աղալարյան