Ռուբիկ ջա՛ն, դու Հայաստանի, հայաստանցու, Արցախի և արցախցու լավ բարեկամն ես. Մանվել Գրիգորյանը՝ Ռուբեն Գալստանյանին

ԵԿՄ վարչության նախագահ, Արցախի հերոս Մանվել Գրիգորյանը ծնդդյան 60-ամյակի առթիվ շնորհավորական ուղերձ է հղել ԵԿՄ Ֆրանսիայի ներկայացուցչության ղեկավար Ռուբեն Գալստանյանին:  Շնորհավորական ուղերձում, մասնավորապես, ասված է.

«Հարգելի՛ իմ ընկեր Ռուբիկ.

Եռասերունդ Երկրապահ կամավորականների միության, Հանրապետության բոլոր երկրապահների, 5-րդ բրիգադի մարտիկների, պատանի, երիտասարդ երկրապահների, առաջնագծում հայրենիքի հանդեպ պարտքը կատարող երկրապահների և իմ անունից ջերմորեն շնորհավորում եմ ծննդյանդ 60-ամյա հոբելյանի կապակցությամբ:

Սիրելի՛ Ռուբիկ, մաղթում եմ քեզ, քո ընտանիքի բոլոր անդամներին առողջություն, երջանկություն, հաջողություններ, իղձերի իրականացում:

Դո՛ւ, Ռուբիկ ջա՛ն, երկրապահ ես քո ապրած ամբողջ կյանքով: Մենք մտերիմ ենք ընտանիքներով, սակայն, դու ոչ միայն իմ բարեկամն ես, այլև Հայաստանի, հայաստանցու, Արցախի և արցախցու լավ բարեկամն ես: Ողջ գործունեությունդ շաղկապված է Երկրապահի հետ, հայրենիքի, Արցախի հետ: Հայրենիք-Սփյուռք միասնության իսկական խորհրդանիշերից ես, իմ լավ բարեկա՛մ Ռուբեն Գալստանյան: Հենց քեզ նման անձնավորություններով է Սփյուռքը Սփյուռք: Քեզ նմանների շնորհիվ է, որ Ֆրանսիայի, Միացյալ Նահանգների, Կանադայի, Ռուսաստանի, Ուկրաինայի, այլևայլ պետությունների հայությունը, աշխարհով մեկ սփռված հայությունը պիտանի է լինում հայրենիքին:

Վստահորեն կարող եմ փաստել, որ անմնացորդ նվիրված ես հայոց պետականության ամրապնդման, Արցախ պետության կայացման, հայ ազգի դարավոր երազանքների իրականացման սուրբ գործին: Եվ պատահական չէ, որ ԵԿՄ վարչության անդամ ես:

Հարգարժա՛ն Ռուբեն, մեր ընկերությունը, անշահախնդիր բարեկամությունը հավերժ են, և մենք միասնաբար դեռ շատ ու շատ ազգանպաստ խնդիրներ ենք դրականորեն լուծելու: Դեռ շատ անելիք ունենք: Այնպես որ՝ ևս անգամ շնորհավորելով հոբելյանիդ կապակցությամբ՝ մաղթում եմ քեզ երկար տարիների առողջ կյանք՝ ի շահ հայ ազգի, ի բարօրություն Հայաստան, Արցախ պետությունների, ի նպաստ Սփյուռքի գաղթօջախների հայապահպանության խնդրի»: