Պերմյակովի գործով վկան պատմել է նրա փախուստի, հայտնաբերման, բազայից դասալքությունների մասին

Գյումրիում կես ժամ ուշացումով մեկնարկեց Ավետիսյանների ընտանիքի յոթ անդամների սպանության մեջ մեղադրվող Վալերի Պերմյակովի գործով դատական նիստը' որպես վկա հրավիրված, պահեստազորի գնդապետ, 102-րդ ռազմաբազայի թերթի խմբագրության պատասխանատու-քարտուղար Աշոտ Կարապետյանի ցուցմունքներով:

«Արմենպրես»-ի թղթակցի հաղորդմամբ' նա, ներկայացնելով դեպքի օրվա մանրամասները, նշեց, որ ռազմաբազայի հրամանատարի ժամանակավոր պաշտոնակատարից ցուցում է ստացել զեկուցել ռազմական ոստիկանություն այն մասին, որ զինվորը ինքնակամ լքել է իր հենակետը' տանելով ինքնաձիգն ու փամփուշտներ:

Վկան անմիջապես զանգահարել է ռազմական ոստիկանություն, սակայն այնտեղից տեղեկացրել են, որ տվյալ պահին բաժանմունքում մարդ չկա և խորհուրդ են տվել տեղեկացնել քաղաքային ոստիկանություն' զինվորի դասալքության մասին:

Երբ սահմանապահ ջոկատի կողմից Պերմյակովին կրկին բերել են բազա, Կարապետյանը հնարավորություն է ունեցել տեսնել ու զրուցել Պերմյակովի հետ:

«Հարցրի' ինչո՞ւ ես սպանություն կատարել: Առաջին անգամ ոչ մի բան չասաց, միայն վերացական նայեց, երկրորդ անգամ հարցնելուց հետո ասաց' ես ոչ մի բան չեմ հիշում, չեմ պատկերացնում' ինչպես կարող էի դա անել»,-պատմեց Աշոտ Կարապետյանը:

«Այդ ընթացքում հեռուստացույցը միացրած էր ու գովազդ էր, Պերմյակովը նույնիսկ քմծիծաղ տվեց, պատկերացրեք' ոճրագործություն կատարողը ծիծաղեց»,- նշեց վկան:

Փաստաբան Լուսինե Սահակյանի այն հարցին, թե դասալքության դեպքեր զորամասում շա՞տ են լինում, վկան նշեց, որ շատ են լինում, բայց առանց ինքաձիգի ու 2-3 ժամ հետո հայտնաբերվում են: Պատահել է նույնիսկ, որ 5-6 ժամ անց են հայտնաբերվել, բայց բոլորն առանց ինքնաձիգի, իսկ ինքնաձիգով դասալքության դեպքեր եղել են, բայց ոչ իր ծառայության ընթացքում, իսկ Կարապետյանը ծառայել է 33 տարի:

Ի դեպ, երբ Պերմյակովին բերել են բազա, վկայի հիշելով, դեմքը կարմրած է եղել, վկան հարցրել է' ինչո՞ւ է կարմիր, հո չեն ծեծել, ասել է' ոչ, ձյան մեջ եմ պառկած եղել:

Վալերի Պերմյակովի գործով դատական գործընթացում այսուհետև Ավետիսյանների իրավահաջորդ, նրանց ընտանիքի դուստր Անահիտ Կոշտոյանի շահերը կպաշտպանի փաստաբան, փաստաբանների պալատի անդամ Արամազդ Կիվիրյանը:

Արմենուհի Մխոյան