Կառավարությունը 10.800 եվրո կհատկացնի Արդարադատության նախարարությանը

Իրավունք 30 Մայիս, 2016 15:14

Կառավարության առաջիկա նիստին, գործադիրը պետբյուջեից 10 հազար 800 եվրոյին համարժեք դրամ (մոտ՝ 5 մլն 767 հազար 200 դրամ) կհատկացնի ՀՀ Արդարադատության նախարարության՝ Մարդու իրավունքների եվրոպական դատարանի կողմից ընդդեմ Հայաստանի կայացրած վճիռների համար քաղաքացիներին դրամական փոխհատուցում տրամադրելու նպատակով։

Հիշեցնենք, որ այս տարվա հունվարին, Մարդու իրավունքների եվրոպական դատարանն ընդդեմ Հայաստանի երեք քաղաքացիների գործով վճիռ է կայացրել: Երեք գործով էլ վճիռը կայացել է հօգուտ դիմող կողմի: Խոսքը վերաբերում է «Գույումչյանն ընդդեմ Հայաստանի», «Թովմասյանն ընդդեմ Հայաստանի» և «Սաֆարյանն ընդդեմ Հայաստանի» գործերին: Այս երեք գործով էլ ՄԻԵԴ-ը որոշել է, որ խախտվել է Կոնվենցիայի 6-րդ հոդվածը։

«Գույումչյանն ընդդեմ Հայաստանի» գործում դիմող կողմը ներկայացնում են Գարեգին Գույումչյանի որդին, հարսը և կինը: Գործն առնչվում է Վանաձորում բնակվող Գարեգինին ու նրա կնոջը՝ Գյուլնազ Գույումչյանին, ովքեր փոքր ընտանեկան բիզնես էին հիմնել: 2002 թվականին Գարեգինը մեղադրվել է կաշառք վերցնելու մեջ, սակայն բավարար ապացույցների բացակայության արդյունքում 2002-ի սեպտեմբերին բոլոր մեղադրանքները հանվել են: Ընտանիքը 2004 թվականին վաճառել է բիզնեսը: Նույն տարում Գարեգինը դատական գործ է հարուցում անօրինական հետապնդումների դիմաց փոխհատուցում ստանալու նպատակով, սակայն նրա հայցը չի բավարարվում:
2006 թվականին առաջին ատյանի դատարանը հայցը բավարարել է մասնակի' հատուցելով միայն դատական ծախսերի և տրանսպորտային ծախսերի մի մասը: Վերաքննիչ քաղաքացիական դատարանը անփոփոխ է թողել առաջին ատյանի դատարանի կայացրած վճիռը: 2007 թվականին Գարեգին Գույումչյանը Վերաքննիչ դատարանի վճռի դեմ վճռաբեկ բողոք է ներկայացրել,սակայն Վճռաբեկ դատարանի աշխատակազմի գրասենյակի պետը գրությամբ վերադարձրել է դիմումատուի վճռաբեկ բողոքը, պատճառաբանելով, որ նրա բողոքը վարույթ չի ընդունվել այն հիմքով, որ այն չի ներկայացվել Վճռաբեկ դատարանում հավատարմագրված փաստաբանի միջոցով։ Դիմումատուները, ըստ էության, նշել են, որ միայն հավատարմագրված փաստաբանի միջոցով վճռաբեկ բողոք ներկայացնելու պարտադիր պահանջը, հանգեցրել է Կոնվենցիայի 6-րդ հոդվածի 1-ին պարբերության խախտմանը:

«Թովմասյանն ընդդեմ Հայաստանի» գործի դիմող կողմը տիկին Թովմասյանն է, ում 1991 թվականին հատկացվել էր բնակարան: Խորհրդային Միության փլուզումից հետո շենքի շինարարությունը դադարեցվել էր: 2007 թվականին Թովմասյանը դիմել էր դատարանին' պահանջելով բնակարան կամ փոխհատուցում: Երկու դեպքում էլ դիմում ներկայացրած քաղաքացիները բողոք էին ներկայացրել ՄԻԵԴ-ին առ այն, որ նրանց հնարավորություն չի տրվել դիմելու Վճռաբեկ դատարան։

«Սաֆարյանն ընդդեմ Հայաստանի» գործի դիմող կողմը Վարյա Սաֆարյանն է, ով ծնվել է 1934 թվականին և բնակվում է Հայաստանում: Գործն առնչվում է Սաֆարյանի բողոքին առ այն, որ նրան չի հաջողվել կիսել և փոխանցել Երևանում գտնվող ունեցվածքը երեխաներին, ինչպես նաև պաշտոնապես գրանցել սեփական հողատարծքում կառուցած տաղավարը: Եվրոպական դատարանը բավարարել է Վարյա Սաֆարյանի դիմումը՝ վճռելով, որ խախտվել է քաղաքացու՝ սեփականության իրավունքը: Ուստի ՄԻԵԴ-ը ՀՀ-ին պարտավորեցրել է քաղաքացուն վճարել 3000 եվրո՝ որպես ոչ նյութական վնասի փոխհատուցում և 630 եվրո՝ որպես ծախսերի փոխհատուցում:

Ք. Աղալարյան