Փաստաբանը դատավորին և դատախազին կաշառք տալու պատրվակով խարդախել ու հափշտակել է, ամբաստանյալի մորն էլ դրդել…

ՀՀ փաստաբանների պալատում հրաշալի փաստաբաններ ունենք' խելացի, ազնիվ, համարձակ, անկաշառ, այսպես ասած, երկակի խաղ չխաղացող, չխարդախող: Սակայն, ցավոք, կան նաև մարդկային ու մասնագիտական պահանջներին չհամապատասխանող փաստաբաններ, որոնցից պալատի ղեկավարությունը փորձում է հնարավորինս ազատվել, այդպիսիններին ցույց տալ իրենց տեղը: Երբեմն հանգամանքները կամ իրավապահ մարմիններն իրենք են ջրի երես հանում այդպիսի փաստաբաններին:

Քրեական գործի նախաքննությամբ պարզվել է, որ Իրինա Մանուկյանը խաբեության և վստահությունը չարաշահելու եղանակով խոշոր չափերի հասնող ուրիշի գույքի հափշտակություն կատարելու դիտավորությամբ, իր պաշտպանյալ' Սյունիքի մարզի ընդհանուր իրավասության դատարանի վարույթում գտնվող թիվ ՍԴ3/0208/01/15 դատական գործով ամբաստանյալ, կալանավոր Արթուր Մկրտչյանին արգելանքից ազատելու և նրա նկատմամբ ազատազրկման հետ չկապված պատիժ նշանակելու համար դատավորին և դատախազին կաշառք տալու պատրվակով, խարդախությամբ գումար է հափշտակել ամբաստանյալի մորից:
Ըստ մեղադրական եզրակացության, Իրինա Մանուկյանն ունեցել է շահադիտական նպատակ, նախքան կարծեցյալ կաշառքի գումարն իրեն հանձնելը գիտակցել է, որ այդ ուղղությամբ, այսինքն' նշված գումարը դատավորին և դատախազին տալու համար որևէ գործողություն չի ձեռնարկելու և գումարը հափշտակելու է:

Օգտվելով իր պաշտպանյալի մոր'Անահիտ Մկրտչյանի' որդու համար ստեղծված իրավիճակում նրա համար առավել բարենպաստ հետևանքներ առաջացնող դատական ակտի կայացման հարցում անձնական շահագրգռվածությունից, Ի. Մանուկյանը, համաձայն քր. գործի նյութերի, Ա. Մկրտչյանին հավաստիացնելով, որ գործնական կապեր ունի դատավճռով որդու նկատմամբ հոդվածի սանկցիայով նախատեսված առավել մեղմ պատժատեսակ'տուգանք նշանակելու իրավասություն ունեցող համապատասխան պաշտոնյաների հետ, ցուցաբերելով իր միջոցով նրանց կաշառք տալու նախաձեռնություն, այդ կերպ ազդել է Ա. Մկրտչյանի գիտակցության և կամքի վրա, նրա մոտ առաջացրել է կաշառք տալու դիտավորություն և վճռականություն: Միաժամանակ գիտակցելով, որ իր գործողություններով պաշտպանյալի մորը դրդում է հանցանքի կատարման և նախատեսելով ու ցանկանալով վերջինիս կողմից այդ հանցանքի կատարումը, Ի. Մանուկյանը նրան դրդել է խոշոր չափերով կաշառք տալուն, և այդ եղանակով 2015 թվականին, երկու առանձին օրերի նրանից առձեռն ստացել է ընդհանուր առմամբ 1 000 000 դրամ, սակայն չի փոխանցել հիշյալ պաշտոնյաներին և հափշտակել է այն: Անահիտ Մկրտչյանը, պայմանավորված վերը նշվածով, իր կամքից անկախ հանգամանքներով չի կարողացել ավարտին հասցնել կաշառք տալու իր հանցավոր մտադրությունը:

Վերը նշված արարքների համար Իրինա Մանուկյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 2-րդ մասի 2-րդ կետի և 34-38-312-րդ հոդվածի (կաշառք տալուն դրդելու հանցափորձը) 2-րդ մասի հատկանիշներով, որպես խափանման միջոց ընտրվել է կալանքը: