Հայկական «Դևիդ Կոպերֆիլդը»

Դուք կարո՞ղ եք պատկերացնել, որ ամբաստանյալը, առանց դատական կարգադրիչի կամ այլ անձի օգնության, կարողանա ձեռնաշղթայով փակված ճաղավանդակը բացել, դուրս գալ, դուրս գալ նույնիսկ դատարանի շենքից ու դիմել փախուստի:
Ճիշտն ասած, դժվար է այս ամենը պատկերացնել, բայց, ըստ նախաքննությունն իրականացրած մարմնի, ամբաստանյալը ձեռնաշղթայով փակված ճաղավանդակը բացել է չպարզված եղանակով: Դե հա, հո ինքը չէ՞ր ասելու, թե ինչպես, ում օգնությամբ է բացել, նախաքննությունն իրականացրած մարմինն էլ եղած ու կոչված է հենց նրա համար, որ քննությամբ պարզի չպարզվածը: Կամ' ի՞նչ է նշանակում ձեռնաշղթայով փակված ճաղավանդակ, բա այս ճաղավանդակի փականքն ի՞նչ էր եղել, ձեռնաշղթան հո կողպե՞ք չէ… Ինչ-որ մեկը պատասխան տվե՞լ է սրա համար:
Քրեական գործի նախաքննությամբ պաշտոնապես պարզել է հետևյալը.
«Սպարտակ Դանիելյանը Կենտրոն և Նորք-Մարաշ վարչական շրջանների ընդհանուր իրավասության դատարանում քննված թիվ ԵԿԴ/0168/01/13 քր. գործով 2015թ. հունիսի 15-ից հանդիսանալով դատապարտյալ և 11.03.2016թ. նույն դատարանում քննվող մեկ այլ' թիվ ԵԿԴ/0045/01/16 քրեական գործով ամբաստանյալ, 25.02.2012թ. փետրվարի 25-ից կալանքի տակ է գտնվել ՀՀ ԱՆ «Նուբարաշեն» ՔԿՀ-ում, սակայն 2016թ. ապրիլի 5-ին, ժամը 17:30-ի սահմաններում դատական նիստից հետո գտնվելով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կալանավորներին պահելու համար նախատեսված խցում, ձեռնաշղթայով փակված ճաղավանդակը չպարզված եղանակով բացելու միջոցով դուրս է եկել դատարանի շենքից, ապա դատարանի ավտոկայանատեղիի պարսպի վրայից ցատկելու միջոցով դիմել է փախուստի: Հետո, ինչպես արդեն հասկանալի է, նրան բռնել են ու հիմա արդեն դատում են առնվազն երրորդ հանցագործության համար:
Վերը նշված արարքի համար Սպարտակ Դանիելյանին մեղադրանք է առաջադրվել ՀՀ քրեական օրենսգրքի 355-րդ հոդվածի («Փախուստն ազատազրկման վայրից, կալանավորվածներին պահելու վայրից կամ ձերբակալվածներին պահելու վայրից») 1-ին մասի հատկանիշով, որպես խափանման միջոց ընտրվել է կալանքը»: