Առանձնապես խոշոր չափերով կաշառք ստանալու համար համայնքապետը քրեական պատասխանատվության է կանչվել

Այո, կանչվել է, բայց կարող էր և հանդիպել մեկ ուրիշին, որը չէր դիմի իրավապահներին, համայնքապետը մինչև հիմա կմնար չբացահայտված ու կշարունակեր նույն գործելակերպը: Նշվածը նկատի ունենալով՝ կարևորենք մեկ այլ խնդիր' ինչպե՞ս է լինում, որ այդպիսի մարդիկ կարողանում են դառնալ համայնքապետ, համայնքի բնակիչների կամքի ազատ արտահայտությամբ և արդարացիորե՞ն են նրանք ընտրվում համայնքի ղեկավար: Անկեղծ ասած, ինչ-որ դժվար է դրան հավատալը:

Քրեական գործի նախաքննությամբ պարզվել է, որ Արայիկ Մանուկյանը հանիսանալով պաշտոնատար անձ, իր լիազորությունների շրջանակներում որոշակի գործողություններ կատարելու և Գրետա Գևորգյանի օգտին որոշում կայացնելու համար նրանից պահանջել ու անձամբ ստացել է առանձնապես խոշոր չափերով կաշառք:
Մասնավորապես, ըստ մեղադրական եզրակացության, աշխատելով Արարատի մարզի Սիփանիկ համայնքի ղեկավարի պաշտոնում և հանդիսանալով պաշտոնատար անձ, Ա. Մանուկյանը Երևանի բնակչուհի Գրետա Գևորգյանի օգտին իր լիազորությունների շրջանակում որոշակի գործողություններ կատարելու, այն է' ձևականորեն կազմակերպվող աճուրդին վերջինիս մասնակցությունն ապահովելու և նրա օգտին որոշում կայացնելու արդյունքում համայնքի տարածքում գտնվող 9 հա գյուղատնտեսական նշանակության հողատարածքը վերջինիս վաճառելու համար, 2014թ. հոկտեմբերին նրանից պահանջել է 5 500 000 դրամ կաշառք և պայմանավորվածություն ձեռք բերելով, 2014թ. նոյեմբերի 28-ին գյուղապետարանում կազմակերպել է ձևական աճուրդ, որին մասնակցել են Գրետա Գևորգյանը և վերջինիս կողմից հրավիրված անձը:

Աճուրդում առաջարկված հողատարածքի վաճառքի առավելագույն գինը կազմել է 1 632 500 դրամ, Գ. Գևորգյանը պատրաստակամություն է հայտնել մուծել միայն աճուրդով սահմանված 1 632 500 դրամը, իսկ կաշառք տալուց հրաժարվել է, ինչի պայմաններում Ա. Մանուկյանը կայացված աճուրդը հայտարարել է չեղյալ:
Դրանից հետո, 2015թ. մարտի 27-ին, համաձայն քր. գործի նյութերի, Գ. Գևորգյանը կրկին դիմել է գյուղապետարան' նշված 9 հա գյուղատնտեսական նշանակության հողատարածքն իրեն վաճառելու համար, որի դիմաց Արայիկ Մանուկյանն այս անգամ ևս պահանջել և 2015թ. ապրիլի 3-ին իր տանն անձամբ Գ. Գևորգյանից ստացել է 5 200 000 դրամ կաշառք, սակայն նույն պահին բռնվել է ոստիկանության աշխատակիցների կողմից:

Նախաքննությամբ վերը նշվածից բացի պարզվել է նաև, որ Գ. Գևորգյանի մասնակցությամբ տեղի ունեցած աճուրդի անցկացման օրը' 2014թ. նոյեմբերի 28-ին, Ա. Մանուկյանը աճուրդի մասնակիցների կողմից աճուրդի անցկացման օրը տվյալ հողամասի մեկնարկային գնի 5 տոկոսի չափով նախավճար մուծելու կապակցությամբ գյուղապետարանի շենքում Գ. Գևորգյանից վերցրել է 100 000 դրամ գումար' նրա և նրա հետ աճուրդին մասնակցած Թոռնիկ Միրզոյանի աճուրդի մասնակցության համար 3000-ական դրամ գումարները և աճուրդի մեկնարկային գնի 5 տոկոսը' 77 625 դրամը գյուղապետարանի բյուջե մուծելու համար, սակայն չի մուծել, այլ, պաշտոնեական դիրքն օգտագործելով, յուրացրել է:
Վերը նշված արարքների համար Արայիկ Մանուկյանին մեղադրանք է առաջադրվել ՀՀ քրեական օրենսգրքի 179-րդ հոդվածի («Յուրացնելը կամ վատնելը») 2-րդ մասի 1-ին կետի և 311-րդ հոդվածի («Կաշառք ստանալը») 4-րդ մասի 2-րդ կետի հատկանիշներով, որպես խափանման միջոց ընտրվել է կալանքը: