Խաբեությամբ ապօրինի իրավունք են ձեռք բերել Երաևանի քաղաքապետարանին պատկանող մոտ կես միլիարդ դրամ արժողության հողամասի նկատմամբ

Ասում ենք տաղանդավոր ազգ ենք, ուրիշներն էլ են ասում… Այո, դա ճիշտ է, բայց այդ տաղանդը երբեմն այնպիսի դրսևորումներ է ունենում, որ բոլորովին հակասում է օրենքին ու հայտնվում Քրեական օրենսգրքի տիրույթում: Մեկ իմանում ենք, որ հայերն այստեղ և Ամերիկայում բանկոմատներ են կոտրել, մեկ իմանում պլաստիկ քարտեր կեղծելու, դրանցով խոշոր գումարներ քաշել-տանելու, մեկ էլ… նույնիսկ Երևանի քաղաքապետարանին ֆռռացնելու մասին, որի աշխատողները, որքան տեղյակ ենք, բոլորովին էլ միամիտ մարդիկ չեն:

Քրեական գործի նախաքննությամբ պարզվել է, որ Հովհաննես Մարգարյանը հանդիսանալով «Էրեբունի գինու գործարան» ՍՊԸ-ի փաստացի սեփականատերը և տնօրենը, 2010թ. հունիսի 15-ին «Էյչ-Էս-Բի-Սի բանկ Հայաստան» ՓԲԸ-ի հետ կնքված համալիր վարկային պայմանագրի հիման վրա «Էրեբունի գինու գործարան» ՍՊԸ-ի անվամբ ստացել է 838 721 657 դրամ նպատակային վարկ, իսկ վարկի ապահովման միջոց է ներկայացրել և այդպիսի միջոց են ձևակերպվել, հանդիսացել Երևանի Նուբարաշեն վարչական շրջանի Նուբարաշեն-Մասիսի խճուղի հասցեներով ընդհանուրը 74.3 հա մակերեսով անշարժ գույքերը:

Համաձայն քր. գործի նյութերի, 2011թ. «Էյչ-Էս-Բի-Սի բանկ Հայաստան» ՓԲԸ-ի համաձայնության հիման վրա դադարեցվել է բանկի գրավի իրավունքը Երևան քաղաքի Նուբարաշեն վարչական շրջանի Նուբարաշեն-Մասիս պճուղի հասցեներով գույքերի նկատմամբ' այն պայմանով, որ հաճախորդը' «Էրեբունի գինու գործարան» ՍՊԸ-ն, կատարի 900 000 ԱՄՆ դոլարի վարկի մարում և տրամադրի նոր գրավի առարկա: Խնդիրն այն է, թե որպես նոր գրավի առարկա ինչ պետք է տրամադրվեր:

Նույն քր. գործի շրջանակում մեղադրանք է առաջադրվել նաև Ստյոպա Հովասափյանին: Ըստ մեղադրական եզրակացության, նա խարդախությամբ ուրիշի առանձնապես խոշոր չափի գույքի նկատմամբ իրավունք ձեռք բերելու շուրջ նախնական համաձայնության գալով Հովհաննես Մարգարյանի հետ, գիտակցելով միմյանց գործողությունները և մեկը մյուսի գործողությունները փոխլրացնելով, իր մտերիմ և ազգական Ռուզվելտ Մեսրոպյանի անվամբ ստեղծված կեղծ փաստաթղթերի հիման վրա խաբեությամբ, ապօրինի իրավունք են ձեռք բերել Երաևանի քաղաքապետարանին պատկանող 499 800 000 դրամ արժողության և 17 հա մակերեսով հողամասի նկատմամբ: Խոսքն առանձնապես խոշոր չափի արժողություն ունեցող գույքի նկատմամբ հանցավոր ճանապարհով անօրինական իրավունք ձեռք բերելու մասին է:

Վերը նշված արարքների համար Հովհաննես Մարգարյանին մեղադրանք է առաջադրվել ՀՀ քրեական օրենսգրքի 325-րդ հոդվածի («Փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը») 1-ին և 2-րդ մասերի, 184-րդ հոդվածի («Գույքային վնաս պատճառելը խաբեության կամ վստահությունը չարաշահելու եղանակով») 2-րդ մասի 1-ին կետի, 178-րդ հոդվածի («Խարդախությունը») 3-րդ մասի 1-ին կետի, իսկ Ստյոպա Հովասափյանի նկատմամբ' 325-րդ հոդվածի հոդվածի 2-րդ մասի և 178-րդ հոդվածի 3-րդ մասի 1-ին կետի հատկանիշներով, Հովհաննես Մարգարյանի նկատմամբ որպես խափանման միջոց ընտրվել է կալանքը: