2 հաղթանակ` մեկ ամսում. ավտոտեսուչների սխալը` ՃՈ-ի պարտության պատճառ

Փաստաբան Հովհաննես Չամսարյանը մեկ ամսվա ընթացքում երկու անգամ դատական կարգով հաղթանակ է տարել Ճանապարհային ոստիկանության նկատմամաբ:

Փաստաբանը ԼՈւՐԵՐ.com-ի թղթակցին պատմեց, որ երկու դեպքից մեկը մինչև դատարան հասնելը բավականին ուշագրավ է եղել, երբ տեսուչը ակտ է կազմել Չամսարյանը հրաժարվել է տեղում ստորագրել և ստանալ արձանագրությունը` խնդրելով ակտն ուղարկել փոստի միջոցով: Տասն ամիս հետո ԴԱՀԿ-ից ստանում է արգելանք դնելու մասին որոշում և տեսնում է, որ նույն ակտն է` արդեն հնգապատկված.

 «Պարզում եմ, որ ակտի վրա իմ ստորագրությունը կեղծված է, նշանակվեց ծառայողական քննություն, փորձաքննություն, ինչն էլ պարզեց, որ իրականում ստորագրությունն ինձ չի պատկանում: Գործն ուղարկվեց ՀՔԾ, հարուցվեց քրեական գործ, կրկին նշանակվեց փորձաքննություն, ինչը նույնպես պարզեց, որ ստորագրությունը կեղծված է և, ամենայն հավանականությամբ, պատկանում է ակտը կազմող տեսուչին»,- ասաց փաստաբանը:

Հովհաննես Չամսարյանը պատմեց մեզ նաև, որ առաջին ատյանի դատարանը և վերաքննիչը մերժել են հայցադիմումը վարույթ ընդունել, իսկ վճռաբեկը բեկանել և գործն ուղարկել է առաջին ատյան` գործը քննելու և վարույթ ընդունելու: «Իրենք չկարողացան ապացուցել, որ իմ կողմից իրավախախտում է տեղի ունեցել, և, որ ես կարմիր լույսի տակով անցել եմ»:

Արդյունքում` բավարարվեց Հովհաննես Չամսարյանի հայցն ընդդեմ ՀՀ ոստիկանության «Ճանապարհային ոստիկանություն» ծառայության և անվավեր ճանաչվեց ՃՈ-ի որոշումը:

Երկրոդ հաղթանակը կապված է եղել տեխզննության կտրոնի փակցված լինել-չլինելու հետ կապված: «Ինձ կանգնեցնում է ՃՈ-ն, ասում է տեխզննության կտրոնը դիմապակու վրա փակցված չէ, չնայած` առկա էր, այնուհետև տեսուչը պնդում է, որ տեսանելի վայրում չէ ամրացված, սակայն կտրոնը փակցված է եղել կառավարության որոշմամբ հաստատված վայրում, վիճարկեցի, ու նա էլի չկարողացավ ապացուցել, որ դիմապակուն կտրոնը կպցված չի եղել»,- ասաց Չամսարյանը:

Փաստաբանն այնպիսի տպավորություն ունի, որ եթե վարորդը իրավաբան չէ և չի զբաղվում իրավաբանական գործունեությամբ կամ պարզապես չի ցանկանում գլխացավանք դարձնել, տանում ու մուծում է տեսուչների կողմից կազմած ակտերը, քանի որ շատ վարորդներ 5.000 դրամի համար չեն դիմի փաստաբանի կամ ժամանակ չեն տրամադրի զբաղվել այդ խնդրով:

Նելլի Ավետիսյան