Սուտասանի պատմությունն է ստացվելու՝ մի օր իսկապես ինչ-որ մեկը զինված հեղաշրջում է անելու, ոչ ոք չհավատա

Շուշիի առանձնակի գումարտակի հրամանատար Ժիրայր Սէֆիլյանի ձերբակալությունը շատերի համար անակնկալ չէր։ Ձերբակալությունից օրեր առաջ «Սուր անկյուն» հաղորդաշարի եթերում անդրադարձ կատարվեց Սէֆիլյանի ու իր անցած մարտական ուղուն՝ փորձելով հասարակության աչքում նսեմացնել նրան, որպես ռազմական գործիչի և հրամանատարի։ Այս հաղորդաշարին հետևեց ՀՀ Քննչական կոմիտեի հաղորդագրությունն, ըստ որի, «2016թ. մայիսի 20-ին Երևան քաղաքի Ծիծեռնակաբերդի խճուղու սկզբնամասում տեղի ունեցած ճանապարհատրանսպորտային պատահարի դեպքի վայր ժամանած ոստիկանության ծառայողները պատահարի մասնակցի ավտոմեքենայից հայտնաբերել են ԱԿ-74 տեսակի երկու ինքնաձիգ՝ 120 փամփուշտներով: Հիշյալ ավտոմեքենայի վարորդն ու ուղևորն ապօրինի կերպով զենք և ռազմամթերք պահելու և փոխադրելու կասկածանքով բերման են ենթարկվել ոստիկանություն»։

Բերման ենթարկված 6 անձանցից մեկն էլ Ժիրայր Սէֆիլյանն է եղել։ «Ժիրայր Սէֆիլյանը մի խումբ անձանց հետ ծրագրել էր զինված խմբավորումների միջոցով, զենքի գործադրմամբ, զավթել շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը, ինչի ընթացքում էլ վերջինս կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը: Ընդ որում, խմբի անդամները որոշ հանցավոր գործողություններ ծրագրել էին իրականացնել ապրիլյան պատերազմին հաջորդող ժամանակահատվածում»։
Քրեական գործով ձեռք բերված ապացույցների հիման վրա որպես մեղադրյալ է ներգրավվել 8 անձ, որոնցից 6-ի նկատմամբ որպես խափանման միջոց է ընտրվել կալանավորումը, 1-ի նկատմամբ՝ ստորագրություն` չհեռանալու մասին, 1 անձի նկատմամբ հայտարարվել է հետախուզում։

Ժիրայր Սէֆիլյանի կողմնակիցներն անտեղյակ են, թե ինչ ավտովթարի մասին է խոսքը։ Ավելին՝ վստահ են, որ դա շինծու մեղադրանք է։ «Հիմնադիր խորհրդարան»-ի փոխնախագահ Վարուժան Ավետիսյանը ԼՈՒՐԵՐ.com-ի հետ զրույցում ասաց, որ այդպես էլ չկարողացան պարզել` ինչ ավտովթարի մասին է խոսքը, ովքեր են այդ վթարված մեքենայի մեջ եղել, և ովքեր են ցուցմունք տվել։

«Սէֆիլյանը կապ չունի այդ վթարի հետ։ Վթարի ժամանակ ոստիկանությունը եկել է և հայտնաբերել այդ զենքը։ Դա շատ խիստ կասկածներ է հարուցում։ Կարծես՝ սարքած միջադեպ լինի։ Ամեն ինչ հուշում է, որ դա կազմակերպված է եղել։ Պարոն Սէֆիլյանը մեքենայի մեջ չի եղել։ Ամենայն հավանականությամբ, էդ մարդիկ, ովքեր վթարը կազմակերպել են, շարունակությունն էլ են արել՝ ցուցմունք են տվել, որ Սէֆիլյանը կապ ունի։ Իսկ այդ վթարի մասնակիցները կալանավորված են։ Ես չգիտեմ, թե ովքեր են դրանք։ Միայն հիշում եմ գրասենյակի խուզարկության ժամանակ դատարանի որոշման փաստաթղթի մեջ ինչ-որ Հովհաննեսի անուն կար նշված։ Ազգանունը չեմ հիշում, մյուսի տվյալներն ընդհանրապես չեմ հիշում, որովհետև այդ պահին ինձ ավելի հետաքրքիր էր, թե ինչ հիմքերով են խուզարկություն իրականացնում»,- մանրամասնեց Վարուժան Ավետիսյանը։

Նրա խոսքով՝ նույն սցենարն է առաջ քաշվում, ինչ բանդայի գործով. «Իբր ուզում են զինված հեղաշրջում անել։ Բայց այստեղ մեկ ուրիշ եզրակացություն էլ է առաջանում։ Արդեն որերորդ անգամ է` զինված հեղաշրջման մեղադրանքով մարդկանց են կալանավորում։ Սուտասանի պատմությունն է ստացվելու՝ մի օր իսկապես ինչ-որ մեկը զինված հեղաշրջում է անելու, ու ոչ մեկը չհավատա։ Արդեն շատ խաղացին այդ թեմայի հետ»։

«Շուշիի առանձնակի գումարտակի ազատամարտիկների միավորում» կազմակերպության անդամ, ազատամարտիկ Պավլիկ Մանուկյանը ևս տեղյակ չէր, թե ինչ ավտովթարի մասին է խոսքը։ Նա միանշանակ պնդում է՝ Սէֆիլյանի ձերբակալությունը քաղաքական պատվեր է։

«Դա արվեց` թուլացնելու այն պայքարը, որը նախաձեռնել է Սէֆիլյանը, տարածքների հետ վերադարձումը և այլն։ Մեզ մոտ հազարին մոտ մարդ էր արձագանքել, պատրաստ էին, ժողովուրդն էլ բավական ակտիվ արձագանքում էր»,- ասաց Մանուկյանը։ Նա նշեց, որ ՇԱԳԱՄ-ը կանգնած է Սէֆիլյանի կողքին. «Բնականաբար։ Մենք ո՞նց կարող ենք չկանգնել նրա կողքին։ Այն մարդիկ, ովքեր անդամագրվել են, ևս պատկերացնում էին, որ նման բան կարող է լինել։ Այս ամեն ինչը կազմակերպված բնույթ է կրում։ Նաև «Սուր անկյուն» հաղորդաշարը պետք է նշել, որովհետև դրամից հետո պարզ էր, որ մի ախմախ բան պետք է անեն։ Շատ պրիմիտիվ են սրանց քայլերը»։

Ժիրայր Սէֆիլյանի նկատմամբ հարուցված քրեական գործի մանրամասների, շենքեր, շինություններ, հաղորդակցության և կապի միջոցներ, այդ թվում՝ Երևանի հեռուստաաշտարակը զավթելու վերաբերյալ, Պավլիկ Մանուկյանը հումորով պատասխանեց. «Ես չեմ զարմանա, որ «նյույորքյան երկվորյակներ»-ը գրավելու մեջ էլ կարող են Ժիրոյին մեղադրել կամ Իրաքում ահաբեկչության մեջ։ Շատ առեղծվածային բաներ կան»։

ՀՀ Քննչական կոմիտեի մամուլի խոսնակ Սոնա Տռուզյանն էլ մեզ փոխանցեց, որ ավտովթարի մասին այլ մանրամասներ, նախաքննության գաղտնիքից ելնելով, չեն կարող ասել։ Հետախուզման մեջ գտնվող անձն էլ դեռ չի հայտնաբերվել։

«Սուր անկյուն» հաղորդաշարը (Սէֆիլյանի մասին պատմող հատվածը՝ 26-րդ րոպեից)

Քրիստինա Աղալարյան