Բա մարդ էլ սեփական բանակը թալանի՞…

Չէ, իսկապես, պատկերացնելը նույնիսկ դժվար է, չէ՞ որ խոսքը ոչ թե մեր թշնամու, այլ հենց մեր բանակի մասին է, իսկ հափշտակվածն էլ որ թե գոնե պահածոներ կամ տնտեսական ինչ-որ ապրանք է, այլ ռազմամթերք, որը հակառակորդի հարձակման դեպքում առաջինն է պետք գալու:

Քրեական գործի նախաքննությամբ պարզվել է, որ Ալեքսանդր Պողոսյանը հանդիսանալով ՀՀ ՊՆ թիվ N զորամասի ժամկետային զինծառայող, 2015թ. ապրիլ ամսից հուլիս ժամանակահատվածում զորամասի պաշտպանական շրջանում տեղակայված թիվ 18 մարտական հենակետում մաքրություն կատարելու ժամանակ, զինաբուրգի մոտից հափշտակել է ռազմամթերք հանդիսացող մեկ հատ Ֆ1 տեսակի նռնակի պայթուցիչ:

Այնուհետև, ըստ մեղադրական եզրակացության, Ա. Պողոսյանը նույն մարտական հենակետում մաքրություն կատարելու ժամանակ խրամուղու վերին հատվածից գտնելու միջոցով ապօրինի կերպով ձեռք է բերել թվով 80 հատ 7.62մմ տրամաչափի ռազմամթերք հանդիսացող փամփուշտներ: Բացի այդ, նույն ժամանակահատվածում ծառայություն իրականացնելու ժամանակ յուրացրել է ծառայության կրման համար իրեն հատկացված ռազմամթերք հանդիսացող թվով 80 հատ 7.62 մմ տրամաչափի փամփուշտներ:

Վերը նշված արարքների համար Ալեքսանդր Պողոսյանին մեղադրանք է առաջադրվել ՀՀ քրեական օրենսգրքի 238-րդ հոդվածի («Զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը») 1-ին մասի, 235-րդ հոդվածի («Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը») 1-ին մաս և 371-րդ հոդվածի («Ռազմական գույքը յուրացնելը կամ վատնելը») 1-ին մասի հատկանիշներով: