Թուրքիայում ռազմական հեղաշրջման փորձի մասնակիցները մտադիր են շարունակել պայքարը

Թուրքիայում ռազմական հեղաշրջման փորձի մասնակիցները հայտարարել են, որ վճռականորեն շարունակում են իրենց պայքարը: Այս մասին հայտնում է Reuters-ը՝  հղում անելով հեղաշրջման մասնակիցների հայտարարությունը:

Նշվում է, որ լրագրողների ձեռքն ընկած փաստաթուղթն ուղարկվել է երկրի ԶՈՒ գլխավոր շտաբի էլեկտրոնային փոստի հասցեից:

Միաժամանակ հեղաշրջման կազմակերպիչները խոստացել են, որ կդիմադրեն բոլոր նրանց, որոնք աջակցում են գործող իշխանություններին:

Հիշեցնենք, որ հուլիսի 15-ի երեկոյան լրատվամիջոցները հաղորդել են Թուրքիայում ռազմական հեղաշրջման փորձի մասին: Անկարայի եւ Ստամբուլի փողոցներում ռազմական տեխնիկա է հայտնվել, տեղի են ունեցել կրակոցներ և պայթյուններ: Մի խումբ զինվորականներ հայտարարել են երկրում իշխանությունը վերցնելու մասին՝ սահմանադրական կարգը վերականգնելու, մարդու իրավունքներն ու ազատությունները ապահովելու նպատակով:

Նախնական տվյալներով 60 մարդ է զոհվել: Հեղաշրջման փորձից հետո 336 մարդ է ձերբակալվել: Թուրքական լրատվամիջոցների փոխանցմամբ, Թուրքիայում ռազմական հեղաշրջումը կազմակերպել է գնդապետ Մուհարեմ Քոսեն:

Թուրքիայի վարչապետ Բինալի Յըլդըրըմը հայտարարել է տեղի ունեցող իրադարձությունների անօրինական լինելու մասին: Նախագահ Ռեջեփ Թայիփ Էրդողանը հայտարարել է, որ հեղաշրջման փորձը ձախողվել է և ամբողջությամբ կճնշվի: