Փաշինյանն այս իրադրությունում Խորենացի փողոցում անելիք չունի

Այսօր ԱԺ պատգամավոր Նիկոլ Փաշինյանը մամուլի ասուլիս էր հրավիրել, որի ժամանակ դատապարտեց բռնությունները, որոնք իրագործվել են խաղաղ ցուցարարաների նկատմամբ բերման ենթարկելուց:

Պատգամավորը ներկայացնելով իր և «Սասնա ծռեր» խմբի հարաբերությունները, ասաց, որ չի եղել իրենց հետ կապված մի գործողություն, որն ինքն արել է առանց խմբի անդամների հետ համաձայնեցնելու` սկսած այն տեսանյութերից, որ նկարահանվել և հրապարակվել են. «Ես նույնիսկ նկարահանումը և հրապարակումը պարտադիր համաձայնեցրել եմ, որովհետև դա լուրջ հարց էր: Ինչ վերաբերում է միջնորդական բնույթի իմ ներգրավվածությանը` դա եղել է միայն սննդի հետ կապված հարցերում»,- ասաց Փաշինյանը:

Պատգամավորի խոսքով` ինքը Խորենացի փողոցում պրոցեսները ոչ կորդինացնելու, ոչ ղեկավարելու որևէ հավակնություն չունի, եթե մարդիկ գտնում են, որ իր ներկայությունը վնասում է իշխանափոխության ծրագրի հաջող իրականացմանը, ուրեմն սրանից հետո պատգամավորը Խորենացի փողոցում կլինի այն ժամանակ, երբ ցուցարարները դրա անհրաժեշտությունը գտնեն և ինքն էլ տեսնի` կա այնտեղ անելիք իր հռչակած քաղաքական ծրագրերի շրջանակում: Հակառակ դեպքում` երեկվա այնտեղ ծավալված իրադարձություններից և դրան հաջորդած մեկնաբանություններից հետո պատգամավորն իր համար անելիք չի տեսնում.

«Ես երեկ ամբողջ գիշեր մնացել եմ այնտեղ, որպեսզի նախ ներկա լինեմ, երկրորդ` ավելի խորքային բնույթի ծանոթանամ իրավիճակին: Այնտեղ մարդիկ էին հայտնվում, ովքեր սեռական բնույթի հայհոյանքներ էին տալիս, մեքենաների շարժ էի նկատում, ինչն ինձ համար ակնհայտ էր, որ դա արվում էր ոստիկանությանը գործելու առիթ տալու համար:

Այնտեղ էին հայտնվել կասկածելի մարդիկ, մի քանի տեղ լոկալ «ռազբորկաներ» էին սկսվել և այստեղ հարց է առաջանում` հիմա նույն «Հիմնադիր խորհրդարան»-ը և «Սասնա ծռեր»-ը այդ ամեն ինչը դատապարտում են, թե` ոչ: Ես երեկ հայտարարեցի հետևյալը. այնտեղ, որտեղ տոն են տալիս հարբած, այլ բաներ օգտագործած և այլ հակումներով մարդկանց ես այդտեղ անելիք չունեմ: Ես նրանց կարող եմ շատ հեշտությամբ սաստել, բայց եթե նրանց սաստելու կամ չեզոքացնելու մղումը պետք է բերի այլ մեկնաբանության, ուրեմն ես այնտեղ չեմ կարող անելիք ունենալ, սա է խնդիրը»,- ասաց Փաշինյանը: