Արամայիս Գրիգորյանը հոգեխանգարմունքի մեջ է ընկել

Այսօր Ազգային ժողով-կառավարություն հարցուպատասխանի օրն էր, խորհրդարան էին եկել վարչապետը և նախարարների պաշտոնակատարները, որոնց վերանշանակման հարցը դեռևս վերջնական լուծում չի ստացել: Շատ է խոսվում այն մասին, որ կառավարությունում արմատական փոփոխություններ են սպասվում, քանի որ նորանշանակ վարչապետ Կարեն Կարապետյանը ստացել է Սերժ Սարգսյանի համաձայնությունը`կադրային փոփոխությունների հարցում ինքնուրույն է լինելու:

Ինքը`Կարեն Կարապետյանը, չի էլ հերքում, թե չի պատրաստվում փոփոխություններ անել:

Այսպես ասած, մութ ամպեր են կուտակվել նաև բնապահպանության նախարարի պաշտոնակատար Արամայիս Գրիգորյանի գլխին, ով այսօր կարծես թե հոգեխանգարմունքի մեջ էր ընկել, դե եկել իրեն պաշտոնից հանում են, ով լիներ նախարարի փոխարեն չէր նեղվի:

Այսօր Ազգային Ժողովում, երբ լրագրողները մոտենում էին այս կամ այն նախարարին` հետաքրքրվելու` արդյոք մնալու են իրենց պաշտոնին թե ոչ, ամեն մի նախարար մի ձևով էր պատասխանում հասկանալով, որ այս պահին հանրությանը քաղաքական վերադասավորումները հետաքրքիր են, թե ինչքան էին դրանք սպառիչ հարցի այլ կողմն է:

Իսկ ահա Արամայիս Գրիգորյանն իրեն ոչ բնորոշ կերպ դրսևորեց: Գրիգորյանը սովորաբար աչքի չէր ընկել ոչ ադեկվատ վարքագծով, սակայն այսօր ինչ որ բան երևի կծել էր պաշտոնակատարին, ինչն իրեն հանգիստ չէր տալիս:

Նախ նախարարի պաշտոնակատարը Ազգային ժողովում կարծես վազքի մրցույթի մասնակցած լիներ, նա այնպես էր փորձում ճողոպրել լրագրողներից, որ տպավորություն էր, թե իր նախարար չվերանշանակվելու գործում գլխավոր մեղավորը լրագրողներն էին: Ամեն դեպքում մեզ հաջողվեց մի երկու բառ կորզել նախարարի պաշտոնակատարից, այն է. «Ես ինֆորմացիա չգիտեմ, չունեմ»:

Մեր այն հարցին, թե արդյոք ինքը վարչապետի հետ որոշակի պայմանավորվածության հասցրել է գալ, մի անհասկանալի և անմեկնելի պատասխան տվեց. «Դա ձեզ վերաբերվո՞ւմ է, դուք ընդհանրապես ինձ հարց տվեք իմ ոլորտից»` մոռանալով, որ այո’,  իր վերանշանակման հարցը մեզ շատ ուղիղ կերպով վերաբերում է:

Ասում են` նախարարի պաշտոնակատարը արդեն հասցրել է տարբեր դռներ թակել իր պաշտոնին մնալու խնդրանքով: Այդ թվում` փորձում է իր գործն առաջ տանել Դաշնակցության միջոցով, դե որպեսզի բարեխոս կանգնեն հին ու նոր ընկերները:

Դժվար է ասել` Գրիգորյանը կվերանշանակվի իր պաշտոնին, թե` ոչ, բայց որ նրա մոտ ծանր հոգեբանական սիտուացիա է ստեղծվել, ակներև է դառնում դրսևորած վարքագծից:

Ն.Ա.