Կառավարությունը հստակ ժամանակացույցով սահմանել է գործարարության զարգացմանն ուղղված քայլերը

Գործարարության զարգացման և խրախուսման նպատակով կառավարությունը պատրաստվում է տնտեսավարողների հետ անընդհատ շփումների միջոցով իրականացնել ակտիվ քաղաքականություն: Ինչպես հաղորդում է e-gov.am-ը, այդ մասին նշված է կառավարության գործունեության ծրագրում, որը ներկայացվել է Ազգային ժողով:

Մասնավորապես, գործադիրի քայլերը կուղղվեն նոր ստեղծվող, ինովացիոն և գերակա համարվող ճյուղերում գործունեություն իրականացնող ձեռնարկությունների և որոշակի չափանիշներին բավարարող՝ մրցակցություն չունեցող նոր ձեռնարկությունների համար առավել բարենպաստ ներդրումային միջավայրի ստեղծմանը (այդ թվում նաև էներգակիրների արտոնյալ սակագներ սահմանելու միջոցով), խոշոր ներդրումային ծրագրերի ընթացքի պարբերական մշտադիտանցմանը և իրականացմանը խոչընդոտող խնդիրների վերհանմանն ու կարգավորմանը, փոքր և միջին ձեռներեցության խթան ման ուղղությամբ համալիր միջոցառումների իրականացմանը:

Մինչև 2016 թվականի ավարտը կառավարությունը խոստանում է սահմանել բնական գազի սակագնային քաղաքականությամբ որոշակի գործունեության տեսակների համար (ջերմոցային տնտեսություններ, գյուղատնտեսական մթերքներ վերամշակողներ և այլն) սահմանափակ ժամկետով գործող արտոնյալ սակագներ, աջակցություն ցուցաբերել, որպեսզի բնական գազ մատակարարող ընկերությունը սպառող կազմակերպությունների համար կիրառի գործունեության ընդլայնումը խթանող մոտեցումներ (օրինակ՝ որոշակի ծավալից ավելի գազ սպառելուց հետո ավելի ցածր սակագներ առաջարկելու միջոցով):

Վեց ամսվա ընթացքում՝ նախատեսվում է ապաքրեականացնել տնտեսական գործունեության ոլորտում նվազ հանրային վտանգավորություն ունեցող իրավախախտումները, վերհանել տնտեսական ակտիվությանը խոչընդոտող իրավանորմերը և դրանց վերացման ուղղությամբ իրականացնել միջոցառումներ, ձևավորել գործարար համայնքի ներկայացուցիչների հետ առավել արդյունավետ համագործակցության ինստիտուցիոնալ հարթակ:

2017 թվականին կառավարությունը ծրագրում է գործունեության որոշակի տեսակներով զբաղվելու համար նախատեսված թույլտվությունների և լիցենզիաների ցանկի կրճատում ու տրամադրման գործընթացների առավելագույն պարզեցում, առնվազն վեց ոլորտում տեսչական գործառույթների փոփոխություն' պատժող մեխանիզմները հնարավորինս կանխարգելող մեխանիզմներով փոխարինելով, ոչ ռիսկային համարվող երկրներից որոշակի ապրանքների ներմուծման ժամանակ համապատասխան փաստաթղթեր (հավաստագրերի, լաբորատոր փորձաքննության արդյունքների և այլն) ներկայացնելու ժամանակ ՀՀ լիազոր մարմնի զննման կամ լաբորատոր փորձաքննության պահանջների վերանայում և կրճատում, բիզնես հաշտարարարի ինստիտուտի հայեցակարգի մշակում և 2018 թվականին ինստիտուտի գործարկում, արժեթղթավորման օրենսդրության փոփոխությունների նախաձեռնում և դրան համապատասխան ինստիտուցիոնալ դաշտի ձևավորում, ոչ հրապարակային պայմանագրային ներդրումային ֆոնդերի համար Հայաստանում ստեղծվելու ու գործելու համար բարենպաստ պայմանների ձևավորում: