Արման Սահակյանը՝ իր և Հովիկ Աբրահամյանի լարված հարաբերությունների մասին

Պետական գույքի կառավարման վարչության պետ, Գալուստ Սահակյանի որդի Արման Սահակյանը վստահեցնում է, որ վարչապետ Կարեն Կարապետյանի հետ իրենց հարաբերությունները շատ նորմալ ու բարիդրացիական են. «Ձևավորվել են նորմալ գործընկերային հարաբերություններ»,- ԼՈՒՐԵՐ.com-ի թղթակցի հետ զրույցում նշեց պաշտոնյան:

Մեր դիտարկմանը՝ նոր վարչապետը գո՞հ է Ձեր աշխատանքից՝ հաշվի առնելով, որ Հովիկ Աբրահամյանն ուներ որոշակի դժգոհություններ, Արման Սահակյանը հավելեց, որ ինքը երբևէ որևէ խնդիր չի ունեցել վարչապետներից և ոչ մեկի հետ:

Մեր պնդմանը՝ հեշտ էր աշխատել նախկին վարչապետ Հովիկ Աբրահամյանի՞, թե՞ գործող վարչապետ Կարեն Կարապետյանի հետ, Սահակյանը պատասխանեց. «Աշխատող մարդու համար միշտ էլ հեշտ է աշխատելը: Միշտ էլ լինում են հեշտ ու դժվար աշխատանքներ: Ես երբեք խնդիրներ չեմ ունեցել և ունենում վարչապետերի հետ: Մեր հարաբերությունները Կարեն Կարապետյանի հետ շատ նորմալ են, նորալ են եղել նաև հարաբերությունները՝ Հովիկ Աբրահամյանի հետ»,- ասաց նա:

Դիտարկմանը՝ Կարեն Կարապետյանն ունի որոշակի դժգոհություններ, նա գո՞հ է մասնավորապես Ձեր աշխատանքից՝ Արման Սահակյանը շարունակեց, որ վարչապետ Կարեն Կարապետյանի հետ հարաբերությունները գործընկերային են, քանի որ նա է ՀՀ կառավարության ղեկավարը: «Գործի ժամանակ մեր հարաբերությունները գործընկերային են: Եթե իմ աշխատանքից նա դժգոհ լիներ, վստահ եմ, որ այս պահին կառավարությունում չէի աշխատի»,- եզրափակեց նա:

Արմինե Եփրեմյան