«ԻԼԻՊ-ը ոչ մի կերպ չի ընդունում Ռուսաստանի ներկայությունը. Իսլամական ֆունդամենտալիզմը շարունակական է». Արման Նավասարդյան

Թուրքիայի մայրաքաղաք Անկարայում ռուս դեսպանի աղմկահարույց սպանության հետևանքների և ռուս-թուրքական հարաբերությունների վրա դրա ազդեցության մասին ԼՈւՐԵՐ.com-ը զրուցեց ՀՀ ԱԳ նախկին փոխնախարար, արտակարգ և լիազոր դեսպան Արման Նավասարդյանի հետ:

-Պարո՛ն Նավասարդյան, ՌԴ դեսպան Անդրեյ Կառլովի սպանությունն ի՞նչ հետևանքներ կունենա Ռուսաստան-Թուրքիա հարաբերությունների վրա:

-Եթե կտրուկ փոփոխություններ էլ չլինեն, ինչպիսին եղավ ինքնաթիռի խոցման ժամանակ, անպայմանորեն որոշակի նստվածք կլինի: Նման տեռորիստական գործողությունների ժամանակ մյուս պետությունն անպայման հաշվի է առնում, թե որ երկրում է տեղի ունեցել նման հանցագործությունը: Կտրվել երկրի հասարակական–քաղաքական, հոգեբանական ֆոնից, շատ դժվար է, սովորաբար դա հետամնաց, ահաբեկչական պետություններին է բնորոշ, ինչպիսին, օրինակ, Աֆղանստանն է, Սիրիան, Լիբիան կամ Թուրքիան:

-Երեկ ՌԴ նախագահն իր խոսքում նշեց, որ այս քայլով ինչ-որ ուժեր փորձել են սեպ խրել երկու բարեկամ ժողովուրդների միջև: ՌԴ ԱԳՆ մամլո խոսնակ Զախարովան տեղի ունեցածը որակեց ահաբեկչություն: Համամի՞տ եք Պուտինի և Զախարովայի գնահատականների հետ:

-Սա ահաբեկչություն է, և ով սա արել է՝ նպատակ է ունեցել ռուս-թուրքական հարաբերություններն արգելափակելու: Հիշենք, որ Ռուսաստանն ու Թուրքիան սկսեցին ակտիվ գործողություններ ծավալել Հալեպում, որը բոլորովին էլ ընդունելի չէր ահաբեկիչների համար: ԻԼԻՊ-ը ոչ մի կերպ չի կարողանում ընդունել Ռուսաստանի ներկայությունը տարածաշրջանում, և տարվող ռուսական քաղաքականությունը՝ Թուրքիայի հետ:
Իսկ տեսակետը, թե սա պետական մակարդակով արվեց, այնքան էլ չեմ կիսում: Ո՛չ Էրդողանը, ով ամենևին էլ հրեշտակ չէ, ո՛չ Ռուսաստանը, հարաբերությունների վատթարացում չէին ուզում: Սա նրանց ձեռնտու չէր:

-Իսկ ու՞մ էր ձեռնտու:

-Սրանք այն ուժերն իրականացրեցին, որոնք դեմ են հակաահաբեկչական գործողություններին: Ռուսաստանն այս ցուցակի առաջին հորիզոնականում է: Սրանով փորձեցին խոցել Ռուսաստանին՝ վիրտուալ տիրույթում: Ես, անկեղծորեն, կասկածում եմ, որ Թուրքիան կարող է ակտիվորեն, պետական մակարդակով պայքարել ահաբեկիչների դեմ, քանի որ նրանց՝ հե՛նց Թուրքիան է սնողն ու ծնողը, և առ այսօր՝ ավելի է հզորացնում այդ շարժումը:

-Իսկ Սպիտակ տան դերակատարությունն այս հանցագործության մեջ նշմարվո՞ւմ է:

-Պետական մակարդակով ասել, որ Սպիտակ տունը կազմակերպեց, ճիշտ չէ, բայց պարտադիր չէ պետական մակարդակով գնան նման գործողությունների. նույն պետության կազմում կարող են լինել կառույցներ, որոնք կարող են կազմակերպել նման ահաբեկչություններ, որը չի բխում տվյալ պետության քաղաքականությունից:

-Անդրադառնալով դեսպանի սպանությանը՝ վարչապետ Մեդվեդևը Facebook-ի իր էջում գրել է, որ միջազգային իրավունքի համաձայն՝ դեսպանի սպանությունը ծանրագույն հանցանք է, որը դուրս է գալիս քաղաքակիրթ հարաբերությունների շրջանակներից։ Եվ Ռուսաստանն անպատիժ չի թողնի դա։ Արդյո՞ք մենք ականատես կլինենք նոր սանկցիաների, ինչպիսին տեսանք նախկինում, որոնք շատ կարճ կյանք ունեցան:

-Ըստ երևույթին՝ այս հանցագործությունից հետո կուժեղանան ռազմական գործողություններն ահաբեկիչների դեմ: Բայց իմ համոզմամբ՝ ահաբկիչների դեմ պայքարը երկարատև գործընթաց է, և ասել, որ կկարողանան նրանց արագ վերացնել, սխալ է: Սկզբից, երբ ռուսական գործողությունները սկսվեցին, Սիրիայում շատերը հույս ունեին, որ ահաբեկիչներին վերացնելը շատ արագ տեղի կունենա, բայց կյանքը ցույց տվեց, որ դա այդպես չէ: Իսլամական ֆունդամենտալիզմը շարունակական գործընթաց է և կարող է տևել երկար տարիներ:

Նելլի Ավետիսյան