«Փաստ». Աղվան Վարդանյանը ՀՅԴ–ի կոալիցիա կազմելու և Գագիկ Ծառուկյանի քաղաքականություն մուտք գործելու մասին

«Փաստ» օրաթերթը գրում է.

«ՀՅԴ ԳՄ անդամ ԱԺ ՀՅԴ խմբակցության քարտուղար Աղվան Վարդանյանը թեև չգիտի ինչու է մամուլում ժամանակ–առ ժամանակ տեղեկություններ շրջանառվում, թե առաջիկա ընտրություններին ՀՅԴ կուսակցությունը կոալիցիա կկազմի ՀՀԿ–ի հետ, բայց «Փաստի» հետ զրույցում նշեց, որ իրենք արդեն իսկ ձևավորել են նախընտրական կենտրոնական և 13 ընտրատարածքային շտաբներ, որտեղ արդեն սկսվել են նախընտրական գործընթացները:

«Ընտրատարածքներն աշխատում են և մենք ինչպես բազմիցս հայտարարել ենք՝ 99 տոկոսով ՀՅԴ կուսակցությունը ընտրություններին կմասնակցի առանձին: Մենք այլ ուժերի նման փնտրտուքների մեջ չենք և մեր հույսը դրել ենք մեր ու մեր աշխատանքի վրա, որպեսզի կարողանանք իրականացնել մեր կուսակցության ծրագրերը»,– ասում է Ա. Վարդանյանը:

Ինչ վերաբերում է պահուստային 1%–ին, ապա այն ըստ քաղաքական գործչի, ֆորսմաժորային իրավիճակների համար է, քանի որ քաղաքական գործընթացների ժամանակ անտրամաբանական է 100%–անոց կանխատեսումներ անելը: Ընտրություններից առաջ ՀՅԴ–ՀՀԿ համագործակցության համաձայնագիրը չեղյալ հայտարարելը նույնպես ՀՅԴ–ի առաջիկա պլաններում չկա: Դաշնակցականները կշարունակեն ներկայի ձևաչափով առաջ շարժվել, քանի որ կառավարության գործունեության մեջ իրենց առջև դրված խնդիրների լուծման քայլեր տեսնում են: Ինչ վերաբերում է այն շարունակել–չշարունակելուն, ապա նման հարցերն ու դրանց մեխանիզմները կհստակեցվեն առաջիկա ընտրությունների արդյունքներից հետո:

«Հիմնովին սխալ է մտածելը, որ եթե մենք այսօր համագործակցում ենք Հանրապետական կուսակցության հետ, դա նշանակում է, որ դաշինքով պետք է մասնակցենք ընտրություններին»,– ասում է ԱԺ ՀՅԴ խմբակցության քարտուղարը:

Խոսելով ընտրություններին ՀՅԴ ռեյտինգային ցուցակով հեղինակավոր մարդկանց հետ ակտիվ բանակցությունների մասին Ա.Վարդանյանն ասաց, որ արդեն իսկ տասնյակ հայտնի մարդկանց հետ հանդիպումներ ու զրույցներ ունեցել են: Եվ քանի որ այդ ցուցակներում ներգրավվելու են ոչ թե կուսակցության անդամներ, այլ իրենց գաղափարախոսությանը մոտ կանգնած անհատներ, ապա առաջիկայում ավելի տեսանելի կդառնա թե ովքեր են համաձայնել դաշնակցականների ռեյտինգային ցուցակում ընդգրկվել:

Արտավազդ Սահակյանին ՀՅԴ ռեյտինգային ցուցակում ընդգրկելու մասին Ա. Վարդանյանն ասաց, որ հայտնի միկրովիրաբույժն իրենց մտերիմ ընկերն է և բնականաբար նման քննարկում եղել է իրենց միջև: Ու թեև այս պահին երկուստեք որևէ որոշում չի կայացվել, սակայն դեռ ժամանակ կա հարցն իր տրամաբանական հանգուցալուծմանը հասցնելու համար:

Գագիկ Ծառուկյանի քաղաքականություն վերադառնալու շուրջ առկա սպասողականության մասին պատգամավորն ասաց, որ թեև տարիներ առաջ նա դուրս եկավ քաղաքականությունից, սակայն երբեք էլ չմեկուսացավ հասարակությունից:

«Գագիկ Ծառուկյանը շարունակեց իր գործունեությունը և՛ սպորտի, և՛ բարեգործության բնագավառներում և այս առումով նա իր դրական կերպարը շարունակում է պահպանել, բայց քաղաքականություն վերադառնալը նրա որոշելիքն է: Այդ որոշումից է կախված նաև շատ շատերի որոշումը, բայց ոչ Դաշնակցության»,– ասաց Ա. Վարդանյանը:

Ընդդիմադիր քաղաքական կուսակցությունների հնարավոր համախմբման մասին քաղաքական գործիչն ասաց, որ նոր Ընտրական օրենսգիրքը երաշխավորում է ընդդիմադիր ուժերի 1/3–ի ներկայությունը պառլամենտում: Ու թեև ՀՅԴ–ն ներկայում իշխանության մաս է կազմում, սակայն նոր Սահմանադրության և նոր ընտրական համակարգերի ընդունմանը նպաստելով իրենց կուսակցությունն ամեն ինչ արել է, որ ընդդիմադիր ուժերը կարողանան ընտրությունների միջոցով Հայաստանում իրավիճակ փոխել: Ու թեև Հայաստանում իրավիճակ փոխելու բոլոր գործիքակազմերը կան, սակայն Ա.Վարդանյանը չի պատկերացնում, որ առաջիկա ընտրություններից առաջ հնարավոր կլինի միասնական ընդդիմադիր դաշինք ձևավորել: Փոխարենը, նա ավելի հավանական է համարում մի քանի ընդդիմադիր դաշինքների կամ միավորների ստեղծումը:

«Ես չեմ տեսնում բոլոր ընդդիմադիրներին մեկ «կաթսայի» մեջ, քանի որ ընտրություններին քիչ ժամանակ է մնացել, բայց նրանք դեռ շարունակում են փնտրտուքները: Եվ համախմբման հիմքում ոչ թե ծրագրային կամ գաղափարական միավորումներ ստեղծելն է, այլ ձայն ունենալու վրա հիմնված հաշվարկները: Բայց շատ կարևոր է, որ առաջիկա խորհրդարանը լինի գործունակ ազգային պետական մտածողություն ունեցող անձնանց հավաքատեղի: Եվ այս առումով մեր հասարակությունը ընտրություն կատարելու ժամանակ պետք է շատ ուշադիր լինի, որպեսզի Հայաստանի նոր խորհրդարանում երկրի պետական շահով մտահոգ մարդիկ ներկայացված լինեն»,– ասում է Ա. Վարդանյանը»:

Շարունակությունը' «Փաստ» օրաթերթի այսօրվա համարում: