Օբաման խախտել է ԱՄՆ–ի շահերը. The Washington Post

Մասաչուսեթսի նախկին նահանգապետ Միթ Ռոմնին, որը համարվում է նոյեմբերին կայանալիք ԱՄՆ–ի նախագահական ընտրություններում Բարաք Օբամայի հիմնական մրցակիցը, ԱՄՆ–ի նախագահին մեղադրել է ԱՄՆ–ի շահերի խախտման մեջ, գրում է The Washington Post–ը։

ԱՄՆ–ի նախագահի հանրապետական թեկնածուն այդ մասին հայտարարել է մայիսի 31–ին Solyndra ընկերության նախաձեռնած հանդիպման ընթացքում։ Ամերիկյան ընկերությունը թեև ԱՄՆ–ի կառավարությունից կես միլիարդ դոլարի վարկային աջակցություն է ստացել, այնուամենայնիվ գտնվում է սննակցման եզրին։  

«ԱՄՆ–ի նախագահը հարկատուներից վերցրել է կես միլիարդ դոլար և իր հայեցողությամբ դա տվել է այն ընկերությանը, որը մեծ ներդրում է կատարել նրա նախընտրական հիմնադրամում։ Դա շահերի լուրջ բախում է», – ասել է Ռոմնին։

Իր ելույթի ընթացքում Ռոմնին այդ ընկերության անհաջողությունը ներկայացրել է ԱՄՆ–ի գործող նախագահի կողմից վարվող վատ տնտեսական քաղաքականության մի փոքր օրինակ, որը ԱՄՆ–ի տնտեսությունը ավելի է շեղել զարգացան ուղուց։ «Նրա կարծիքով, կառավարության ճնշման տակ ընդունված որոշումները ԱՄՆ–ն ավելի հզոր է դարձնում։ Ընդհակառակը՝ այդ որոշումները մեզ թուլացնում են», – հայտարարել է Ռոմնին։ 

Մասաչուսեթսի նախկին նահանգապետի կարծիքով, Օբաման չի հասկանում ազատ ձեռնարկատիրության հիմնասյուները։ 

Ինչպես նշում է The Washington Post–ը, Կալիֆոռնիայի Ֆրիմոնթ քաղաքում գտնվող Solyndra գործարան Ռոմնիի նախատեսված այցը նրա նախընտրական շտաբը գաղտնի է պահել՝ մտավախություն ունենալով, որ Օբամայի նախընտրական շտաբը կփորձի ամեն գնով խոչընդոտել այն։ 

Օբամայի վարչակազմն ընկերությանը 535 միլիոն դոլար վարկի երաշխիք տրամադրելու որոշում է կայացրել 2009–ի սեպտեմբերին։ Solyndra ընկերությունը զբաղվել է արևային մարտկոցների մշակմամբ և արտադրությամբ։ ԱՄՆ–ի վարչակազմի կողմից ընկերությանն օգնություն տրամադրելը նոր աշխատատեղեր ստեղծելու նպատակ է հետապնդել։ 2010–ի գարնանը ձեռնարկություն է այցելել Օբաման։ Իսկ 2011–ի օգոստոսին ընկերությունը սննկացման եզրին է հայտնվել։ 

Հանրապետականներն ընտրողների ուշադրությունը հրավիրել են այն փաստի վրա, որ այդ ընկերության գլխավոր ներդրողներից մեկը համարվում է միլիարդատեր Ջորջ Քայզերը, որը ֆինանսավորել է Օբամայի՝ 2008–ի նախընտրական քարոզարշավը։

Մայիսի 29–ին Տեխասում կայացած նախընտրական փրայմերիզում տարած հաղթանակից հետո, ենթադրվում է, որ Ռոմնին վաստակել է բավարար պատվիրակների աջակցությունը՝ օգոստոսին կայանալիք Հանրապետական կուսակցության համաժողովում։ Հանրապետականների նախընտրական մրցավազքում Ռոմնիի դեմ պայքարում է Ռոն Փոլը, որը, համաձայն ամերիկյան լրատվամիջոցների, չի հաջողի վաստակել բավարար քանակությամբ պատվիրակների աջակցությունը նախագահի միասնական թեկնածու լինելու համար։

Մայիսի 31–ին Ռոմնիին ԱՄՆ–ի նախագահական ընտրություններում իր աջակցությունն է հայտնել Ռոնալդ Ռեյգանի այրին՝ Նենսի Ռեյգանը։ Ըստ նրա, «նախագահ Ռեյգանին դուր կգար Ռոմնիի գործարար փորձը և նրա սկզբունքայնությունը»։ Ավելի վաղ, Ռոմնիին աջակցելու մասին հայտարարություն էին արել ԱՄՆ–ի նախկին նախագահ Ջորջ Բուշ ավագը և Ջորջ Բուշ կրտսերը, ինչպես նաև Հանրապետական կուսակցության այլ հայտնի քաղաքական գործիչներ։