Հայաստանին հուշում են ելքը

Հայաստանն ու Չինաստանը կստորագրեն խաղաղ նպատակներով միջուկային էներգիայի անվտանգ օգտագործման մասին համաձայնագիր: Համապատասխան որոշման նախագիծն այսօր հաստատել է ՀՀ կառավարությունը:  Ըստ փաստաթղթի, համաձայնագիրը կծառայի ատոմային էներգիայի բացառապես խաղաղ նպատակներով օգտագործմանը ու չի օգտագործվի միջուկային զենքի և այլ միջուկային պայթուցիկ սարքերի ստեղծման կամ որևէ այլ ռազմավարական նպատակի հասնելու համար:

Միջուկային խաղաղ ծրագրերը միանգամայն դրական են գնահատվում, քանզի աշխարհի երկրները միանշանակ փաստում են, որ աշխարհում ատոմային էներգետիկան այլընտրանք չունի եւ, ի դեպ, աշխարհը նույնպես գնում է այս ուղղությամբ: Պարզ հարց է ծագում. հապա ինչո՞ւմն է հարցը, ինչո՞ւ աշխարհի շատ երկրներ, որոնք զարգացնում են իրենց այդ ոլորտը, չեն հանդուրժում մի շարք այլ երկրների նմանատիպ քայլերը: Պատասխանը  մեկն է. միջուկային ծրագրերը միայն տնտեսություն չեն, դրանք ռազմա-քաղաքական խոշոր ու հզոր հաղթաթղթեր են: Հայաստանը Չինաստանին էլ հետաքրքրում է անկասկած տարածաշրջանային համատեքստում, բայց նաեւ դրանում իր առանցքային դերով, որ պայմանավորված է մի շարք էական թե՛ տնտեսական, թե՛ ռազմաքաղաքական գործոններով: Դա միանշանակ բխում է մեր պետության շահերից: Որքան դիվերսիֆիկացվի Հայաստանում կատարվող ներդրումների աշխարհագրությունը, հատկապես էներգետիկ ոլորտում, որքան շատ երկրներ նման խոշոր ծրագրեր իրականացնեն Հայաստանում, այնքան Հայաստանի անկախությունը կմեծանա կամ կփոքրանա կախվածությունը մեկ երկրից: Արտերկիրը շարունակում է խորհուրդ տալ. ՀՀ-ն ատոմային էներգետիկայի փոխարեն կարող է զարկ տալ վերականգնվող էներգետիկայի զարգացմանը, քանզի վերականգնվող էներգիայի զգալի պաշարներ ունի: Արտերկիրն իր այս առաջարկը բացատրում է հետեւյալ հանգամանքով. ՀՀ-ն բնապահպանական խնդիրներ չի ունենա: Միաժամանակ, հարկ է նշել, որ Հայաստանի ատոմային և վերականգնվող էներգետիկայի զարգացումը միմյանց չեն հակասում: Մենք պարտավոր ենք զարգացնել երկուսն էլ, քանի որ մեր տարածաշրջանում գործող թուրք-ադրբեջանա-վրացական ներկայիս ռազմաքաղաքականությունը չի նպաստում Հայաստանի միջուկային խաղաղ ծրագրերը այդ երկրների հետ համագործակցության ոլորտ բերելուն: Հետևաբար, գործընկերներ պետք է փնտրել Արևելքում:

Ստելլա Խաչատրյան